धादिङमा चुनावी सरगर्मी बढ्यो
कपन अनलाइन
धादिङ, १८ चैत । स्थानीय तहको निर्वाचनको मिति नजिकिँदै गर्दा राजनीतिक सरगर्मी बढ्दै गएको छ ।
नेकपा एमाले, नेपाली काँग्रेस र नेकपा (माओवादी केन्द्र)ले चुनावी अभियानलाई गाउँगाउँसम्म पुर्याएका छन् । चुनावी प्रतिस्पर्धाका लागि उम्मेदवारहरु जोडघटाउमा लागेका छन् ।
दुई नगरपालिका र ११ गाउँपालिका रहेको धादिङमा यतिखेर निर्वाचनको तयारी तीव्र रुपमा अघि बढेको छ । सबैजसो गाउँपालिकामा नेपाली काँग्रेस, नेकपा एमाले, नेकपा (माओवादी केन्द्र), राप्रपा लगायतका दललले निर्वाचन लक्षित कार्यक्रम सञ्चालन गरिरहेका छन् । नीलकण्ठ नगरपालिकामा निर्वाचनका लागि दलहरु उम्मेदवार छान्नका लागि तयारी गरिरहेका छन् ।
जिल्ला निर्वाचन कार्यालयले निर्वाचन सफल पार्न एक सय ९ मतदानस्थल तथा दुई सय ५० भन्दा बढी मतदान केन्द्र बनाउने गरी प्रस्ताव गरेको जिल्ला निर्वाचन अधिकारी ईश्वर सिङ्खडाले जानकारी दिए । सबै वडामा मतदानस्थल राखिनेगरी वातावरण मिलाइएकाले मतदातालाई सुविधा दिनेगरी व्यवस्था गरिएको उनको भनाइ छ ।
धादिङमा दुई लाख ६ हजार ४५ मतदाता रहेका छन् । मतदाता शिक्षाका लागि सबै वडामा मतदाता शिक्षा पुर्याउने तयारी गरिएको सिङ्खडा बताउँछन् । मतदानस्थल तय भएकाले संवेदनशील स्थानको छनोट गरी सुरक्षा योजना बनाउने तथा बिना अवरोध मतदान गर्ने वातावरण मिलाउन लागिपरेको प्रहरी उपरीक्षक शरद खत्रीको भनाइ छ । रासस
