बनेपामा २५ वर्षपछि मुकुन्डो नाच हुँदै
कपन अनलाइन
बनेपा: बनेपाको लायकु र गणेशस्थानमा मुकुन्डो देवी नाच हुने भएको छ । झन्डै २५ वर्षपछि हुन लागेको यो नाच तीनदिनसम्म सञ्चालन हुने जनाएको छ ।
नेवार समुदायभित्रका पनि डङ्गोल, महर्जन र तुलाधरले आगामी २६ गते गर्न लागेको ‘श्वेतकालीन नरदेवी नेटमरु अजिमा’ गण नाचको विभिन्न तयारी सुरु भइसकेको श्वेतकालीन संरक्षण तथा व्यवस्थापन समितिका अध्यक्ष सत्यनारायण डङ्गोलले जानकारी दिनुभयो ।नाचका लागि खाने, बस्ने सुविधा र स्वास्थ्य शिविर सञ्चालनका लागि आवश्यक तयारी भइरहेको उहाँले बताउनुभयो ।
अध्यक्ष डङ्गोलले विगतमा यस नाचका लागि तत्कालीन राजाले सहयोग गरेको उल्लेख गर्दै अहिले सरकार दायित्वबाट पन्छिन खोजेको आरोप लगाउनुभयो । गुठीका गुठियारले व्यक्तिगत रुपमा सङ्कलन गरेको रु तीन लाखबाट सो नाच हुन लागेको छ । ललितपुर र कीर्तिपुरमा सम्पन्न भइसकेको सो नाच भोलि शनिबार भक्तपुरमा पनि हुँदैछ ।
देशमा दैवी प्रकोप नहोस् र नागरिकले सुरक्षित जीवनयापन गर्न पाउन् भन्ने धार्मिक विश्वासले विगत लामो समयदेखि यो नाच नाच्दै आएको अध्यक्ष डङ्गोलको भनाइ छ । अनुष्ठानिक र मनोरञ्जनात्मक दुईखाले हुने सो मुकुन्डो नाच बनेपामा अनुष्ठानिक विधिमा हुन लागेको संस्कृतविद् ज्ञानकाजी मानन्धरले जानकारी दिनुभयो ।
तान्त्रिक विधिबाट पूजाआजा गरिने भएकाले यसलाई अनुष्ठानिक भनिएको उल्लेख गर्दै मानन्धरले सो नाचमा काठमाडौँको नरदेवीबाट २०० जना सहभागी हुने बताउनुभयो ।
पहिलो दिन विधिपूर्वक पूजाआजा हुन्छ, त्यसपछि देवीले पदभार ग्रहण गर्छन् र नाच नाच्छन् उहाँले भन्नुभयो ।
संस्कृतविद् मानन्धरले नाच सकिएपछि देवी चण्डेश्वरी माताको पूजा हुने उल्लेख गर्दै श्वेतकालीन देवी चण्डेश्वरी आफ्नो माता भएकाले बनेपामा नै सो नाच हुने गरेको तर्क गर्नुभयो । बाजागाजासहित आयोजना हुने सो नाचको आवाज गर्भवती महिलाले सुने गर्भवती महिलाबाट जन्मने शिशु अङ्गभङ्ग हुने धार्मिक विश्वाससमेत रहेको छ । यो नाच हेर्न, पाँचखाल, नमोबुद्ध, दाप्चा क्षेत्रबाटसमेत स्थानीयवासी बनेपा आउँछन् । रासस
