लागुऔषध दुरुपयोग तथा ओसारपसारविरुद्धको अन्तर्राष्ट्रिय दिवस
कपन अनलाइन
काठमाडौँ, ४ असार । ‘बालबालिका र युवाको स्वास्थ्य र सुरक्षित विकासका लागि सर्वप्रथम उनीहरुको कुरा सुनौँ’ भन्ने मूल नाराका साथ लागुऔषध दुरुपयोग तथा ओसारपसारविरुद्धको अन्तर्राष्ट्रिय दिवस नेपालमा पनि विविध कार्यक्रमसहित सप्ताहव्यापी रुपमा मनाउने भएको छ ।
विविधि कार्यक्रमको आयोजना गरिने भएको छ । गृहमन्त्रालयमा आज आयोजित पत्रकार सम्मेलनमा मन्त्रालयका सहसचिव केदार न्यौपानेले यही असार ६ देखि १२ गतेसम्म विविधि कार्यक्रमको आयोजना गरी यो दिवस मुलुकभरी मनाउने तयारी गरिएको जानकारी दिनुभयो ।
लागुऔषध एक जना व्यक्तिको नभई सिङ्गो समाजको समस्या भएकाले समाज नै मिलेर यसको सामना गर्नुपर्ने उहाँले बताउनुभयो ।
नेपाल प्रहरीको लागुऔषध नियन्त्रण ब्युरोका प्रमुख धिरु बस्न्यातले लागुऔषधको प्रयोग वृद्धि हुनु भनेको स्वतः अपराधको पनि वृद्धि हुनु भएकाले यसको नियन्त्रणका लागि सबै पक्षको सहयोग र समन्वय आवश्यक रहेको छ भन्नुभयो ।
प्रहरीको मात्रै सक्रियताले लागुऔषध नियन्त्रण सम्भव नभएको भन्दै घरपरिवार, विद्यालय, समाज सबैले यसको निगरानी राख्नुपर्नेमा उहाँले जोड दिनुभयो ।
दिवसका अवसर पारेर नेपालभरका चलचित्र भवनमा लागुऔषधविरुद्धको सचेतनासम्बन्धी सामग्री प्रसारण गर्ने, स्थानीय निकायका जनप्रतिनिधिलाई सहभागी गराई अन्तक्र्रिया कार्यक्रम गर्नेे, विद्यालय र कलेजमा सचेतना कार्यक्रम सञ्चालन गर्ने लगायतका कार्यक्रम गर्ने तयारी भइरहेको सो अवसरमा जानकारी गराइयो ।
यस्तै असार १२ गते दिवसको अवसर पारेर प्रभातफेरी तथा प्रज्ञा–प्रतिष्ठानमा अन्तक्र्रिया कार्यक्रमको आयोजना गरिने भएको छ । नेपालमा एक लख ४२ हजार कडा लागुऔषधका प्रयोगकर्ता रहेको र हरेक वर्ष ११ दशमलव ६७ प्रतिशतले बढिरहेको छ । जसमध्ये महिलाको सङ्ख्या १० प्रतिशत छन् ।
संयुक्त राष्ट्रसङ्घको महासभाले ७ डिसेम्बर १९८७ मा प्रत्येक वर्ष जुन २६ लाई लागुऔषध दुरुपयोग तथा ओसारपसारविरुद्धको अन्तर्राष्ट्रिय दिवसका रुपमा मनाउने निर्णय गरेको थियो । रासस
