मतदाताको अन्तिम नामावली सार्वजनिक
काठमाडौँ, ५ फागुन । नेकपा (एमाले) निकट अनेरास्ववियुको नयाँ नेतृत्वका लागि एकहजार ५९७ मतदाताले मतदान गर्ने भएका छन् ।
निर्वाचन कमिटिले १७ पदाधिकारीसहित १४२ सदस्यीय समितिका लागि मतदाताको अन्तिम नामावली सार्वजनिक गरेको हो ।
सङ्गठनका अध्यक्ष किशोरविक्रम मल्लले विभिन्न पदका लागि ६०० विद्यार्थीको उम्मेदवारी दर्ता भएको जानकारी दिँदै अहिले प्रचारप्रसारका लागि समय राखिएको र सो समयपछि आजै मतदान प्रक्रिया सुरु गरी अध्यक्ष मण्डलले मतगणनाका लागि समझदारी तथा आवश्यक नियम बनाउने बताउनुभयो ।
प्रज्ञा प्रतिष्ठानमा १८ वटा मतदान केन्द्र बनाइएको छ । एकपटकमा १२० जनाले मतदान गर्नसक्ने व्यवस्था गरिएको छ । उहाँले प्रतिस्पर्धाबाट आउने नेतृत्वले अहिले शिक्षामा भइरहेको निजीकरण तथा व्यापारीकरणले मुलुकमा शैक्षिक क्षेत्रमा अन्योलता देखिएकाले त्यसलाई अन्त्य गरी गुणस्तरीय शिक्षा स्थापनाका लागि भूमिका निर्वाह गनुपर्नेमा जोड दिनुभयो ।
बिहीबारदेखि जारी सम्मेलन समयमा सम्पन्न हुननसक्दा प्रतिदिन रु २० लाखका दरले खर्च थपिएको छ ।
