सहयोगको नाममा कसैको पीडा नबेचौँ : सुनिता अधिकारी

कपन अनलाइन
काठमाडौं, असोज ३ ।

बाढीले घरबार गुमाएका, आफन्त गुमाएका,
भोक र त्रासमा बाँचिरहेका मानिसहरूलाई अहिले हाम्रो प्रचार होइन,
हाम्रो साथ चाहिएको छ ।
राहतको एउटा प्याकेट दिँदा
क्यामेरा अगाडि उभिनैपर्छ भन्ने छैन ।
कसैको आँसु देखाएर
आफ्नो उदारता प्रमाणित गर्नुपर्दैन ।
कसैको विवशता सामाजिक सञ्जालमा राखेर
आफ्नो महानता देखाउनुपर्दैन ।

पीडितको दुःख हाम्रो सामग्री होइन ।
उनीहरूको आँसु हाम्रो प्रचारको माध्यम होइन ।
उनीहरूको असहायपन हाम्रो प्रसिद्धिको साधन होइन ।
हामीले दिएको सहयोगको फोटो हजारौँ मानिसले देख्नुभन्दा,
त्यही सहयोगले एउटा पीडित परिवारको घरमा चुलो बल्नु ठूलो कुरा हो ।

हामीले गरेको सहयोगको चर्चा समाजले गर्नुभन्दा,
कसैको मनमा ‘कठिन समयमा
कसैले मलाई साथ दिएको थियो’ भन्ने सम्झना रहनु ठूलो कुरा हो ।
साँचो सहयोग त्यतिबेला अझ पवित्र हुन्छ,
जब सहयोग गर्ने हातभन्दा सहयोग पाउनेको सम्मान ठूलो हुन्छ ।

त्यसैले आउनुहोस्—
सहयोग गरौँ, तर प्रदर्शन नगरौँ ।
साथ दिऔँ, तर आत्मसम्मान नखोसौँ ।
राहत दिऔँ, तर पीडालाई सामग्री नबनाऔँ ।
मानवता गरौँ,
तर त्यसको मूल्य लाइक र शेयरमा नखोजौँ ।

किनकि दायाँ हातले गरेको सहयोग
बायाँ हातलाई थाहा नहुनु केवल भनाइ होइन—
यो निःस्वार्थ मानवताको सुन्दर उदाहरण हो ।

आज उनीहरूलाई हाम्रो नाम होइन,
हाम्रो हात चाहिएको छ ।
आज उनीहरूलाई हाम्रो भिडियो होइन,
हाम्रो सहयोग चाहिएको छ ।
मानवताको सेवा गरौँ—
तर मानवताको सम्मान पनि गरौँ ।

सहकार्य : कपन बानेश्वर साहित्यिक साप्ताहिक