मोटरसाइकल चोरीमा संलग्न दुई जना पक्राउ
कपन अनलाइन
काठमाण्डौ ,मङ्सिर ६ ।
मोटरसाइकल चोरीमा संलग्न दुई जनालाई मंगलबार काठमाडौँ महानगरपालिका २२ स्थित गणबहालबाट ट्राफिक प्रहरीले नियन्त्रणमा लिएको छ ।
चितवनको ईच्छाकामना गाउँपालिका ४ घर भई काठमाडौंको न्युरोड बस्दै आएका २३ वर्षीय टेक बहादुर मगर र सिन्धुलीको दुधौली नगरपालिका २ घर भई काठमाडौंकै शंकटा बस्ने २२ वर्षीय रोहित तामाङलाई ट्राफिक प्रहरीले नियन्त्रणमा लिएको हो । बागमती प्रदेश ०२(०३१ प ३९ २९ नम्बरको मोटरसाइकल काठमाडौं महानगरपालिका १६ म्हेपी स्थित पार्किङबाट गत कार्तिक २४ गते हराएको भनि काठमाडौँ उपत्यका ट्राफिक प्रहरी कार्यालयमा निवेदन प्राप्त भएको थियो ।
वास्तविक नम्बर परिवर्तन गरि बागमती प्रदेश ०२(०३१ प ९२ नम्बर राखी चलाइरहेको अवस्थामा काठमाडौँ उपत्यका ट्राफिक प्रहरी कार्यालयमा रहेको पिडित सहायता ईकाइबाट खटिएको टोलीले मोटरसाइकल सहित फेला पारी चोरीमा संलग्न २ जनालाई गणबहालबाट आज दिउँसो नियन्त्रणमा लिएको हो । नियन्त्रणमा आएका दुवै जनालाई थप अनुसन्धान तथा कारबाहीका लागी प्रहरी वृत्त लैनचौर पठाइएको छ ।
आफ्नो सवारी साधन सुरक्षित स्थानमा पार्किङ गर्ने, ह्वील लक, चेन लक, ह्यान्डिल लक, डिस्क लक, लगायत सुरक्षा साइरनहरु जडान गर्नुका साथै मानिसहरूको आवत जावत नहुने एकान्त स्थानमा पार्किङ नगर्न काठमाडौँ उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्र प्रसाद भट्टले सम्पूर्णलाई अनुरोध गरेका छन ।
हराएका सवारी साधन खोजतलास र चोरी नियन्त्रण कार्य निरन्तर हुँदै आएता पनि सवारी धनी स्वयम् सजक हुनुपर्ने समेत प्रवक्ता भट्टले बताए ।
सवारी साधन हराएमा ट्राफिक प्रहरीको हटलाईन नम्बर १०३, नेपाल प्रहरीको हटलाईन नम्बर १०० मा फोन गर्न र नजिकको प्रहरी कार्यालयमा निवेदन दिन सकिने छ ।
