जीवनवादी छोटा कविताहरू : पेशल आचार्य (कविता )
कपन अनलाइन
काठमाण्डौ ,असार १।
१. आशा
हामी वर्षौंदेखि
भोकलाई
मिठो व्यञ्जन मानेर
आश्वासनमा हाली
निरन्तर निरन्तर चपाइरहेछौं ।
२. केन्द्रविन्दु
काठमाडौँको नाभी
धरहरा
मनमा विराजमान भो
अब हामी घुम्दैछौं फनफनी ।
३. कवि
शब्दका पाँजाबाट
अक्षरका दाना झारेर
फेसबुके आत्मरतिमा
आजकाल अघोरै रमाउँछ – ऊ ।
४. मार्ग
ध्यानको राजमार्गमा
वर्षौंवर्ष हराएको म
स्वज्ञान पिउनका लागि ।
५. यौन
जति जोते पनि
कहिल्यै बाँझो नमारिने
अटेरी ! पर्ती खेत !
६. प्रेम
मोरीले
झन्नै गाल पारी
होटलको बिल तिर्ने बेलाँ
धन्न पर्स रित्तो रहेनछ ।
७. सन्तान
आउँछन्
खान्छन्
रून्छन्
हाँस्छन्
र बाआमालाई ओल्चेर जान्छन्
एकएक ओटा छुद्र वचन ।
८. उत्तेजना
पर्दा उघारेपछि
अनायाश बिजुली चम्कियो
देखेँ,
ऊ सर्वाङ्ग नाङ्गै रहिछे ।
९. देश
जसको देश हुन्छ
उसले पिर, दुखाइ र स्वाभीमान्
लुकाउने ठाउँ पाउँछ
जसको देश हुँदैन
उसले पिर, दुखाइ र स्वाभीमान्
लुकाउने दुलो पनि पाउँदैन ।
सहकार्य : कपन बानेश्वर साहित्यिक साप्ताहिक
