चार्ली हेब्डोले प्रकाशित गरेको कार्टुन छापेका कारण फेरि जर्मन पत्रिकामा आक्रमण

कपन अनलाइन\पुस २७, २०७१

फ्रान्सको पत्रिका ‘चार्ली हेब्डो’ले छापेको कार्टुन पुनः छापेकै कारण जर्मनीको एक पत्रिकामा आइतबार आक्रमण भएको छ । कार्टुन छापेकै कारण गत बुधबार आक्रमणमा परेको ‘चार्ली हेब्डो’ पत्रिकाको कार्यालयमा रहेका १२ जना पत्रकारको ज्यान गएको थियो । आइतबार जर्मनीमा सोही कार्टुन छापेको कारणले गर्दा ‘ह्याम्बर्गर म्यागेजिन’मा आगजनी गरिएको थियो । आगजनीबाट कुनै मानवीय क्षति भने नभएको स्थानीय प्रहरीले जनाएका छन् । चार्ली हेब्डोमा आक्रमण भएपछि जर्मनीको उक्त पत्रिकाले पैगम्बर महोम्मदका तीनवटा कार्टुन छापेको थियो ।

आक्रमणबाट पत्रिकाको भुइँतल्लाको कोठा र झ्यालहरू क्षतिग्रस्त भएका छन् । आक्रमण हुनुभन्दा केही अघि झ्यालबाट ढुंगा फ्याँकेका उनीहरूले तत्कालै बलिरहेको वस्तु फ्याँकेपछि आगलागी भएको थियो । चार्ली हेब्डोको कार्यालयमा आक्रमण गर्ने समूहले नै ह्याम्बर्गरमा आगजनी गरेको जर्मन प्रहरीले जनाएको छ ।