स्थानीय तहको निर्वाचन प्रदेशले गराउनुपर्छः अध्यक्ष यादव

कपन अनलाइन 

रौतहट, ५ चैत । सङ्घीय समाजवादी फोरम नेपालका अध्यक्ष उपेन्द्र यादवले सीमाङ्कनको टुङ्गो नलगाइकन गरिने स्थानीय तहको निर्वाचन हुन नसक्ने बताउनुभएको छ ।

आज सदरमुकाम गौरमा आयोजित पत्रकार सम्मेलनमा उहाँले भन्नुभयो “स्थानीय तहको निर्वाचन प्रदेशले गराउनुपर्नेमा सोको टुङ्गो नलगाई निर्वाचनको मिति तोकिनु गलत भएको छ ।”

अध्यक्ष यादबले माध्यमिक तहको परीक्षा सकिएलगत्तै सरकारको यो निर्णय विरुद्ध सशक्त आन्दोलनको घोषणा गर्ने बताउँदै अबको आन्दोलन मधेसकेन्द्रित नभइ देशव्यापी हुने धारणा व्यक्त गर्नुभयो ।

सरकारले अहिले विभिन्न बाहना बनाएर आफूहरुको माग पूरा गर्न आलटाल गरिरहेको आरोप लगाउँदै उहाँले सरकारको अगामी कार्यनीति हेरेर आन्दोलनको स्वरुप अगाडि बढउने बताउनुभयो । रासस