पाँचथरमा चार झोलुङ्गे र तीन ट्रसपुल बन्ने
कपन अनलाइन
पाँचथर, १८ फागुन । पाँचथरमा यस वर्ष चार झोलुङ्गे र तीनवटा ट्रस पुल बन्ने भएका छन् ।
जिविसका इन्जिनियर प्रेम काफ्लेका अनुसार चिगरुप, सिस्ने, कान्दाङ, नाम्धु दोबान, झोलुङ्गे पुल, डडुवा, बाँसबोटे र धुवाँबजार ट्रसपुल गरेर सातवटा पुल बन्नेछन् । यसअन्तर्गत दुरदिम्बा–२ र लिम्बा–४ जोड्ने चिगरुप झोलुङ्गे पुल बनिने भएको छ जसका लागि रु ३० लाख ४२ हजार विनियोजन भएको छ ।
यस्तै, लिम्बा–९ र लिम्बा–७ जोडिने सिस्ने झोलुङ्गे पुलका लागि रु २८ लाख ९६ हजार, च्याङथापु–४ र च्याङथापु–५ जोडिने कान्दाङ पुलका लागि रु २७ लाख २४ हजार विनियोजन गरिएको छ ।
त्यसैगरी, थर्पु–२ र ताप्लेजुङ साब्लाखु–३ जोड्ने डडुवा ट्रस पुलका लागि रु ३३ लाख ९८ हजार, सराङडाँडा–६ र माङजाबुङ–६ बस्ने धुवाबजार ट्रसका लागि रु २३ लाख ३२ हजार र इम्बुङ–६ तथा नवमीडाँडा–२ जोडिने बाँसबोटे ट्रस पुलका लागि रु २३ लाख ४९ हजार विनियोजन गरिएको इन्जिनियर काफ्लेले बताउनुभयो ।
अहिलेसम्म सबै पुलको अवस्था हेर्दा ५० प्रतिशत काम सकिएको र सम्झौता अवधि यही आव २०७३÷७४ भित्रैमा सकिने उहाँको भनाइ छ । रासस
