महानगरका प्रमुख विद्यासुन्दर शाक्यको संयोजकत्वमा सहिद सप्ताह मुल समारोह समिति गठन
कपन अनलाइन
काठमाडौ,माघ ९।
यस बर्षको सहिद सप्ताह मनाउन महानगरका प्रमुख विद्यासुन्दर शाक्यको संयोजकत्वमा मुल समारोह समिति गठन गरिएको छ ।
समितिको उपसंयोजकमा महानगरकी उपप्रमुख हरिप्रभा खड्गी श्रेष्ठ रहेकी छन भने सदस्यहरुमा, महानगरको वडा नं. ७, १२, १५, र २६ वडा अध्यक्षहरु, महानगरका प्रमुख प्रशासकीय प्रमुख, बिभागीय प्रमुख, आयोजना तथा कार्यक्रम प्रमुख, नेपाली सेना, शशस्त्र प्रहरी, गृह मन्त्रालय, नेपाल स्काउटका प्रतिनिधि रहनुभएको छ । समितिको सदस्य सचिवमा नगर नायव प्रहरी उपरीक्षक धनपति सापकोटा हुनुहुन्छ ।
वि. सं. २०१२ सालदेखि विद्यमान महानगरको संयोजकत्वमा मनाइँदै आएको सहिद सप्ताह अन्तर्गत यस बर्ष पनि माघ १० गतेदेखि १६ गतेसम्म विविध कार्यक्रम आयोजना गरिनेछन् ।
जस अन्तर्गत माघ १० गते विहान ०८ः०० बजे टेकु खरिवोटमा शुक्रराज शास्त्रीले अमरत्व प्राप्त गरेको स्थानमा श्रद्धाञ्जली सभाबाट कार्यक्रमको थालनी हुनेछ । त्यस्तै माघ १३ गते विहान ०८ः०० बजे सिफलस्थित धर्मभक्त माथेमाले अमरत्व प्राप्त गरेको स्थानमा, १५ गते विहान ०८ः०० बजे गंगालाल श्रेष्ठ र दशरथ चन्दले अमरत्व प्राप्त गरेको स्थान, शोभा भगवतीमा श्रद्धाञ्जली सभा हुनेछ ।
माघ १६ गते सहिद दिवसका दिन बिहान साढे आठ बजे शान्तिबाटिका रत्नपार्कबाट प्रभातफेरी शुरु हुनेछ । प्रधानमन्त्री, मन्त्री, सरकारका उच्पदस्थ अधिकारी, जनप्रतिनिधि, सुरक्षा निकायको ब्याण्ड टोली र मार्चपास टोलीसहितको प्रभातफेरी विहान नौ बजे सहिद स्मारक लैनचौरपछि ज्ञात अज्ञात सहिदप्रति श्रद्धाञ्जली अर्पण गर्ने कार्यक्रम तयार गरिएको छ ।
यस बर्षको सप्ताहलाई व्यवस्थित गर्न सरसफाइको जिम्मेबारी वातावरण व्यवस्थापन विभागलाई दिइएको छ भने झाँकीको व्यवस्थापन हनुमान ढोका दरबार क्षेत्र कार्यक्रमले व्यवस्थापन गर्नेछ । त्यस्तै सहरी पूर्वाधार विकास विभागले कार्यक्रम स्थलको रंगरोगन गर्नेछ । कार्यक्रम अवधिमा कार्यक्रम स्थल तथा रुट व्यवस्थापनको जिम्मा नगर प्रहरी महाशाखालाइृ दिइएको छ भने जनस्वास्थ्य विभागलाई स्वास्थ्य शिविर सञ्चालन गर्ने र सहिद दिवसका विषयमा विद्यालयस्तरीय बक्तृत्वकला प्रतियोगिता गर्ने जिम्मेबारी शिक्षा बिभागलाई दिइएको छ ।
मूल समारोह समितिको आइतबार सम्पन्न बैठकले महानगरले स्थापना गरेको पुस्तकालयको नाम परिवर्तन गरी सहिद पुस्तकालय बनाउने निर्णयसमेत गरेको छ ।
समाचार साभार :काठमाडौँ अनलाइन (चन्द्रमणी भट्टराई )
