नेपाली राजनीतिमा गगन थापा

अहिले हाम्रो सामू चुनाव छ । हामी भविष्यदृष्टि सहितको आदर्श नेतृत्व (भिजिनरी नेता) छान्ने कि अमुक दलको सामान्य कार्यकर्ता छान्ने ? हामीले गरिबी र अचेतनाको यथास्थितिमा राजनीति गर्ने पात्र छान्ने कि संवृद्धि र चेतनाको राजनीति गर्ने पात्र छान्ने ? हामीलाई समयको सुविधा पटक्कै छैन ।  ४/ ५ बर्षमै गरेर देखाउने नेतृत्व चाहिएको छ । हामीलाई अवश्य पनि आर्थिक बृद्धि चाहिएको छ तर सामजिक न्याय सहितको । हाम्रो लोकतन्त्र अब कसैले खोस्न सक्तैन । लोकतन्त्रबारे राजनितिक बहस जरुरी छैन अब । लोकतन्त्रको जीत भइसकेको छ । अब हामीले विजय प्राप्त गर्नु पर्ने गरिवीविरुद्ध हो । गरिवी र अचेतनालाई यथास्थितिमै राखेर राजनीति गर्न चाहने बिरुद्ध हो ।

हामीसँग भिजिनरी नेता छैनन्, राजनेता छैनन् भनेर गफैमात्र गरेर बसे हामीले कहिल्यै नेता पाउँदैनौं ।  नेपाली राजनीतिमा त्यस्ता केही आशा लाग्दा ‘फिगर’हरु झुल्किसकेका छन् । ती मध्ये एक हुन्, गगन थापा । अमर्त्य सेनको कल्याणकारी अर्थशास्त्रबाट प्रभावित र बिपीको समाजवादलाई कल्याणकारी पूँजीवादको रुपमा व्याख्या गर्ने गगन दर्शन र वादका छलफलभन्दा पनि “डेभलपमेन्ट डिस्कोर्स” (विकास विमर्श) गर्न रूंचाउँछन् ।उनीसँग “परोपकारी विकास”का योजना छन्, अर्थशास्त्रीको भाषामा लोककल्याणकारी राज्यव्यवस्थाका खाका छन् । उनी आर्थिक विकास चाहन्छन्, तर सामजिक न्याय सहितको ।

गगन थापाबाट उनी सम्बद्ध दल, अन्य दल र राजनीतिबाहिरका धेरै नेपालीले  ठूलो आशा गरेका छन् । मैले सुरुमा उल्लेख गरेर भनिसकें, आखिरमा गर्ने एउटै व्यक्तिले हो। गगन काम गरेर देखाउन पाउने स्थानमा पुग्न सकेमा उनले यथास्थितिमा परिवर्तन ल्याउन सक्छन् भन्ने कुरा भर्खरै स्वास्थ्यमन्त्री भएर मुलुकको स्वास्थ्य क्षेत्रमा दूरगामी प्रभाव पार्ने काम गरेर देखाइसकेका छन् । उनीसँग कल्याणकारी लोकतन्त्रमा आधारित देशनिर्माणका खाका छन् ।

देश निर्माणको नेतृत्व एउटैले गर्ने  हुँदाहुँदै पनि प्रजातन्त्रमा देशनिर्माणको जिम्मा जनता मै हुन्छ । उनलाई अवसर दिने त जनताले नै  हो । हामीले गरीबी र अचेतनाको यथास्थितिमा राजनीति गर्ने पात्र छान्ने कि समृद्धि र चेतनाको राजनीति गर्ने पात्र छान्ने ? प्रत्येक निर्वाचन भनेको “चुनाव” अर्थात् छनौट हो र यस पटक तपाईंको मत गर्ने छनौट मुलुकको भाग्य निर्माण गर्न ऐतिहासिक हुन सक्दछ ।

तपाइँको प्रतिक्रिया ।