कपनमा अन्तर्राष्टिय गुणस्तरको मिनरल वाटर
कपन अनलाइनपानी बिना मानव जीवनको कल्पना गर्न नसकिए पनि हामी नेपाली खानेपानी राम्ररी उपभोग गर्न नपाउने विश्वका थोरै मुलुकहरुमध्ये पर्दछौं । खानेपानीका लागि दीर्घकालिन योजनाहरुको अभावमा सहरी क्षेत्रमा पानीको दिनप्रतिदिन अभाव बढ्दो छ । यस्तो अवस्थामा निजि क्षेत्रले गर्ने खानेपानीको विविध उपायमा सहरियाहरु बाँचिरहेका छन् ।
खानेपानीको अभावमा बाँचिरहेका सहरका बासिन्दाभित्र हामी कपनवासी पनि पर्दछौं । कपनमा खानेपानीको अभाव यहाँको बस्ति विकाससँगै देखिएको हो । तर यहाँ पनि दीर्घकालिन योजना खासै देखिदैन । पानीको विकल्पका लागि हाम्रो कपनमा सुरु गरिएको विभिन्न योजनामध्ये कपन गाविस वडा नं. ९ मा रहेका कपन अक्वा मिनरल वाटर उद्योगले विश्वस्तरीय पानीको उत्पादन गरिरहेको छ । बजारभरी ट्यांकरमा ल्याइएको पानीलाई जारमा हालेर बेच्नेहरुको लहर चलिरहेको बेला कपनमा यस्तो उद्योगले विगत १ वर्षदेखि आफ्नो गुणस्तरीय पानी वितरण गरिरहेको छ ।
करिब ५० लाख लगानी गरेर सुरु गरिएको यो उद्योग विशेषगरी कपन तथा यस आसपासका क्षेत्रमा लक्षित रहेको छ । कपनमा नै बसोवास गर्ने राजाराम बुढाथोकी, कमलराज श्रेष्ठ तथा मिङ्मा शेर्पाको संयक्त प्रयास र लगानीमा यो उद्योग स्थापना भएको हो । स्थायी श्रोतको मूलको पानीलाई व्यवस्थित तरिकाले ७ वटा फिल्टरबाट सफा गरिएको यो पानी पूर्णतः रसायनमुक्त रहेको संचालक कमलराज श्रेष्ठ बताउँछन् । यसरी रसायनमुक्त पानी नेपालमा नै एकदमै कम पाइन्छ । यस कम्पनीले हाल दैनिक ७०० जार पानी उत्पादन गरिरहेको छ भने भविष्यमा १३०० जार सम्म उत्पाद गरिने पनि श्रेष्ठ बताउँछन् ।
अन्तर्राष्टियस्तरको मिडिया फिल्टर,कार्बन फिल्टर, माइक्रोन फिल्टर, रिभर्स अस्मोसिस फिल्टरबाट पानीलाई सफा गरेर स्टिलको ट्यांकीमा भर्ने देशका थोरै मात्र मिनरल वाटर उद्योगमध्ये यो पनि एक भएको राजाराज बुढाथोकी बताउँछन् । कपनको सामाजिक तथा राजनीतिक जीवनमा पनि चिनिएका राजाराम बुढाथोकीका अनुसार पानीको गुणस्तरका लागि हरेका महिना ल्याब टेस्ट गरिन्छ । यस कपन अक्वा मिनरल वाटरले प्रयोग गर्ने बोटल पनि प्रमाणित मात्र प्रयोग गरेको बुढाथोकी बताउँछन् । उनी भन्छन् हामीले प्रयोग गर्ने जार पनि अधिकतम ५० पटक पानी हालेपछि प्रयोग गर्ने गरेका छैनौ ।
राजनीति गर्ने राजाराम बुढाथोकी, नेपाली कागजको काम गर्ने कमलराज श्रेष्ठ तथा ट्रेकिङको काम गर्ने मिङ्मा शेर्पाको यो उत्साहजन प्रयास बजारमा पाइने अरु पानीभन्दा मंहगो पनि छैन । कपनका अधिकांश पसल, ग्रोसरी तथा मार्टहरुमा कपन अक्वा नै बिक्ने गरेको छ । साथै यस कम्पनीले कपन गाविसलगायत विभिन्न ठाउँमा निःशुल्क पानी पिउने व्यवस्थासमेत गरेको छ ।
– फोटो ः राजु बिक्रम थापा
