रिता सिंहले निलम्बित वैद्य र दाहाललाई पूर्नबहाली गरिन्, छानबिन समिति संयोजक पदच्यूत

कपन अनलाइन, १९ असार, २०७३

विवादै विवादको चौघेरामा रहेकी बालमन्दिर अध्यक्ष रिता सिंहले अत्यन्त जधन्य स्वरुपको विषयमा निलम्बनमा रहेका कार्यकारी निर्देशक बालकृष्ण बैद्य र महासचिव सुरज दाहाललाई पूर्नबहाली गरेकी छिन् । वैद्य र दाहाल बालमन्दिरले बनाएको अधिकारसम्पन्न छानबिन समितिबाट बालबच्चा बेचबिखन विषयमा संघीय अपराध गरेको भन्दै निलम्बित थिए । नेपाल बाल संगठन बालमन्दिरको केन्द्रिय समितिले ०७३ बैशाख २९ र ३० गते बसेको बैठकबाट बनेको अधिकार सम्पन्न छानविन समितिले बाल संगठन बालमन्दिरका बालबालिकालाई खुशी घर नामको संस्थालाई अनधिकृत रुपमा पठाएकालगायतका विषयमा उनीहरु आरोपित थिए । सो अधिकारसम्पन्न समितिका संयोजक बाल संगठनका उपाध्यक्ष तुलसीनारायण श्रेष्ठ थिए भने संस्थाकै सुमन साक्य र सनतकुमार कार्की सदस्य थिए । यस अधिकारसम्पन्न समितिले पेश गरेको १२ पेजको प्रतिवेदनलाई लामो समय चुपचाप राखेर निलम्बित वैद्य र दाहाललाई अध्यक्ष रिता सिंहले पूर्नबहाली गरेकी छिन् भने समितिका संयोजक तथा संस्थाका अध्यक्ष तुलसीनारायण श्रेष्ठलाई पदच्यूत गरेकी छिन् ।

२६ वर्षदेखि निरन्तर राज चलाउँदै आएकी अध्यक्ष रिता सिंह बाल संगठनको अध्यक्ष पदमा पाँचौ पटक बहाल छिन् तर उनले आफ्नो पदको दुरुपयोग गरेको पटकपक सार्वजनि भएको छ । पछिल्लोपटक बालमन्दिरको २९ रोपनी जग्गा ४३ वर्षका लागि कसैलाई नसोधी लिजमा रहेको दिँदै सो बापत लिएको ७५ लाख संस्थाको खातामा नभएको विषयले सिंहलाई अप्ठेरो परेको छ । सिंहलाई बैद्य र दाहालको सहयोगमा बिभिन्न कुकृत्य गरेको आरोप लाग्दै आएकोमा निलम्बनमा परेका निज द्वयलाई पूर्नबहाली गरेपछि उनको नियत खराब रहेको प्रमाणित भएको एक सदस्यले कपन अनलाइनसँग नाम नलेख्ने शर्तमा भने । बाल संगठनको उच्चस्तिय छानविन समितिले के प्रतिवेदन पेश गरेको थियो सो यहाँ राखिएको छ ।