दश फाँकी साइनोका : छायादत्त न्यौपाने बगर (कविता )
कपन अनलाइन
काठमाडौं असार ९।
बारी यो सिजनाको
बिउ माग्छ साधनाको
सम्झना सूत्र साइनोको !
माटो मासी रम्नु छ
छाप्राको रस चुस्नु छ
गउँत छरी चोखिनु छ !
यो हो कुरौटे मेलो
सञ्जालको सङ्कुचन
मन–विवेक विचलन ?
चतुर खेलाडी हुँ
सुन साट्छु घुनशीत
ध्याउन्न मेरो म बाँच्ने ?
तिखा ती काँडाहरू
फूल मन पर्ने मान्छे
जतनले बाँच्छ जीवन !
कुरा हुन्छन् माटाका
यी कर्म जति व्यक्तिका
द्वन्द्व चल्छन् भागबिलाका !
म रम्छु पैसासँग
मन रम्छ मनसँग
जीवन हो सिर्जनासँग !
पुरानै छ नि नसा
नफेरी हुन्न टाउको
सबै जोगी कान चिरुवा ?
पेलिने हो निमुखा
पेल्छ सत्ता भत्ता जत्था
व्यक्ति–सुख, राज्य खपत ?
यी अनन्त जिज्ञासा
खै कति भए सिर्जना
गति थप भन्छ साधना !
सहकार्य : कपन बानेश्वर साहित्यिक साप्ताहिक
तपाइँको प्रतिक्रिया ।
