काठमाडौं महानगरपालिका वडा नं ७ चाबहिल चोकमा आकाशे पुल उदघाटन

कपन अनलाइन

काठमाडौं ,असोज २१।

काठमाडौं महानगरपालिका वडा नं ७  चाबहिल चोकमा निर्मित आकाशे पुल आज उदघाटन गरिएको छ । उक्त  फलामे आकाशे पुलको महानगरका प्रमुख  विद्यासुन्दर शाक्यले रिबन काटेर असोज २१ गते  बुधवार  बिहान उदघाटन गरेका छन।

१ करोड २१ लाख ३३ हजार ८४३ रुपैयाँको लागतमा निर्माण गरिएको सो  आकाशे पुलको लम्बाइ २३ मिटर र चौडाइ २ मिटरको छ ।

२०७६ माघ ९ गते सो पुलको शिलान्यास भएको सो पुल निर्माणको जिम्मा कान्छामान निर्माण सेवाले पाएको थियो। नटबोल्ट खोलेर एक ठाउँबाट अर्को ठाउँमा सार्न मिल्ने सो  आकाशे पुल बनेपछि चाबहिलको व्यस्त चोकमा बाटो काट्न सहज भएको छ।

सो आकाशे पुल उद्घाटन कार्यक्रममा प्रमुख शाक्य सहित नेकपा महानगर अध्यक्ष निर्मल देउला ,वडा नं ७ का अध्यक्ष सुद्ध डंगोल ,सदस्य कृष्ण मणि भट्टराई ,निर्मला पुडासैनी ,सकुन्तला सुन्दास लगायतको उपस्थिति रहेको थियो।