काठमाडौं बौद्ध बाट रक्तचन्दन तस्कर पक्राउ

गएराति महानगरीय प्रहरी अपराध महाशाखाको टोलीले गरेको अरपेशनमा चार जना रक्तचन्दन कारोबारीलाई पक्राउ गरेको हो ।महाशाखाका अनुसार उनीहरूले डमरुभित्र लुकाएर रक्तचन्दनको कारोबार गर्ने गरेको खुलासा भएको छ ।

पक्राउ पर्नेमा नुवाकोट किस्पाङ गाउँपालिका घर भएका सुनिल तामाङ, म्याजम गाउँ पालिका घर भएका २८ वर्षीय ओमबहादुर तामाङ, काभ्रे तिमालका २९ वर्षीय कैलाश तामाङ र सिन्धुपाल्चोक हेलम्बु घर भएका ४२ वर्षीय लाक्का लामा रहेका छन् ।

प्रहरीले उनीहरुका साथबाट २१ किलो ९ सय ग्राम रक्तचन्दन बरामद गरेको छ।आठ हजार ५ सय रुपैयाँ किलोको दरले बिक्री गर्न लागेको अवस्थामा उनीहरुलाई रक्तचन्दनसहित काठमाडौंको बौद्धबाट नियन्त्रणमा लिएको महाशाखाले जनाएको छ ।

योजनाकार फरार

रक्तचन्दन कारोबारमा संलग्न चार जनाले डमरुमा रक्तचन्दन भर्ने जिम्मा मात्र पाएका थिए । तस्करीका मुख्य योजनाकार भने फरार छन् । नुवाकोट म्याजम गाउँपालिकाका ओमबहादुर तामाङ र रविन गुरुङको भेट नयाँ दिल्लीमा भयो । लकडाउन पछि काठमाडौं आएका ओमबहादुरले रविनलाई डमरु कारखानाका सम्पर्कमा लगे ।

रविनले दुईवटा रक्तचन्दनको मुढा दिएर त्यसलाई डमरुमा सेट गर्न भन्दै आफुसँग अरु धेरै रक्तचन्दन रहेको जानकारी गराए ।

प्रतिकिलो ८ हजार ५ सयमा बेच्नका लागी रविनको योजनामा कैलास र लाक्पा आइतबार ‘ग्राहक डिल’ गर्दै थिए । करिब ५ सय केजी रक्तचन्दन बेचबिखन गर्न लागेको सुराकका आधारमा अपराध महाशाखाको टोलीले उनीहरुलाई पक्राउ गरेको हो । तर, मुख्य योजनाकार रविन गुरुङ फरार छन् ।