खाई खाई विकास गरौं !

कपन अनलाइन 

काठमाडौँ,फागुन ११ । नवराज न्यौपाने ‘मौन’

देशको विकास त्यसै हुँदैन
देशभक्तिको चर्को नारा लाउनु पर्छ
चाहेको ठाउँमा पुग्नु छ भने
ठूलाबडाको निवास सारा धाउनु पर्छ
पाउमा लम्पसार परेर भए पनि
ठूलाबडाको भजन गाउनु पर्छ
ज्ञापनपत्र बुझाएर भन्नु पर्छ कि
मेरो पनि पालो आउनु पर्छ

मुखले बोलेर मात्र राजनीति हुँदैन
दह्रो हातले पार्टीको झन्डा समाउनु पर्छ
जनताको मन जितेर भए पनि
दशतिरको कोषबाट खाइखाइ कमाउनु पर्छ
बल प्रयोग गरेर भए पनि
विरोधी जति सबैलाई ठेगान लगाउनु पर्छ
अरुलाई जोगाउने मन छ भने
खाईखाई नै जोगाउनु पर्छ

गरीब बनेर राजनीति चलाउन सकिन्न
धनी बन्ने धुनमा धुन्धुकारी नै बन्नु पर्छ
नियम मिचेर गरेको काम सबै
नियम संगत नै छ भन्नु पर्छ
गुन लगाउन मन लाग्यो भने
आफ्नो गूटको मान्छे गन्नु पर्छ
सुन लगाउन मन लाग्यो भने
सुरक्षा निकायहरु छल्नु पर्छ

प्रगति धेरै नभए पनि
समृद्धिको नारा घन्कनु पर्छ
खोले खाएर भए पनि
विश्वमा हामी चम्कनु पर्छ
करै करको आम्दानीले भए पनि
बिकासको पथमा लम्कनु पर्छ
बिकासको पथमा लम्कनु पर्छ