विभिन्न स्थानमा एनसेल टावरमा आगजनी

कपन अनलाइन

काठमाडौं, माघ१३। गए राति देशभरका विभिन्न स्थानमा एनसेलको विभिन्न टावरमा अज्ञात समूहले आगजनी गरेको छ ।

पाल्पाको खैरहनी नगरपालिका र बगनासकाली गाउँपालिका, सिन्धुलीको मरिण गाउँपालिका, रामेछापको दोरम्बा गाउँपालिका, सर्लाहीको लालबन्दी नगरपालिका र पश्चिम नवलपरासीको रामग्राम नगरपालिकामा रहेको एनसेल टावरमा अज्ञात समूहले आगलागी गरेको हो ।

पाल्पाको बगनासकाली गाउँपालिका–९ मा रहेकोे टावरमा पौने १० बजे र खैरहनी नगरपालिका–२ मा रहेको टावरमा राति पौने ११ बजे अज्ञात समूहले आगजनी गरेको हो । खैरहनीको टावरको जेनेरेटर र ट्रान्सफर्मरमा क्षति पुगेको छ भने बगनासकालीको टावरमा पूर्णरूपमा क्षति पुगेको छ ।

यस्तै सिन्धुलीको मरिण गाउँपालिका–७ को टावर पूर्णरूपमा क्षति भएको छ । रामेछापको दोरम्बा गाउँपालिका–७ गुम्सीमा रहेको एनसेल टावरमा भएको आगजनीका कारण टावरमा रहेका तारहरु जलेको छ ।
सर्लाहीको लालबन्दी नगरपालिका–१६ मा रहेको एनसेल टावरमा भने विस्फोट गराइएको छ । विस्फोटका कारण सोलार प्यानल, युपिएस तथा तारहरुमा क्षति पुगेको जनाइएको छ । पश्चिम नवलपरासीको रामग्राम नगरपालिकामा रहेको टावरमा गरिएको आगजनीबाट टावरको अगाडिपट्टिको तार जलेको छ ।

एनसेलका यी टावरहरुमा कसले र किन आगजनी गर्यो भन्ने खुल्न सकेको छैन । घटनामा संलग्नको खोजी भइरहेको र घटनाको आवश्यक अनुसन्धान भइरहेको प्रहरीले जनाएको छ ।