टोखा नगरपालिका – ३ को जेष्ठ नागरिक सम्मान तथा न्यानो कपडा बितरण कार्यक्रम सम्पन्न

कपन अनलाइन

काठमाडौं,पुस २३। टोखा नगरपालिका वडा नं- ३ ले  जेष्ठ नागरिक सम्मान तथा न्यानो कपडा वितरण कार्यक्रम सम्पन्न गरेको छ ।

आइतबार वडा कार्यालय परिसरमा एक कार्यक्रमको आयोजना गरी जेष्ठ नागरिक एकल, विधुवा महिला तथा फरक क्षमताभएका व्यक्तिहरुलाई न्यानो कपडा स्वरुप ज्याकेट वितरण गरेको हो ।

“जेष्ठ नागरिकको सम्मान गरौँ, कला र संस्कृतिको जर्गेना गरौँ” भन्ने मूल नाराका साथ विगत दुई वर्षदेखि गरिदै आइरहेको कार्यक्रम अन्तर्गत आफ्नो वडाका जेष्ठ नागरिकहरुलाई उक्त कपडा वितरण गरिएको हो।

जाडोयामा आफ्नो वडामा रहेका जेष्ठ नागरिकहरुलाई न्यानोका लागि ज्याकेट वितरण गरिएको टोखा नगरपालिका- ३ का वडाध्यक्ष सिंहराज श्रेष्ठले बताए।

टोखा नगरपालिकाका उपप्रमुख ज्ञानमाया डंगोलको विशिष्ठ आतिथ्यता तथा वडा सदस्यहरुको उपस्थिति रहेको उक्त कार्यक्रममा वडाका ३८० जना जेष्ठ नागरिक तथा एकल विधुवा महिलाहरुलाई न्यानो कपडा वितरण गर्नुका साथै खाजाको समेत व्यवस्था गरिएको वडाध्यक्ष श्रेष्ठले बताए।

फोटो सौजन्य: न्यूज अफ टोखा