श्रद्धाका साथ श्रीकृष्ण जन्माष्टमी मानाइँदै, कपनका कृष्ण मन्दिरमा भीड

कपन अनलाइनआज श्रीकृष्ण जन्माष्टमी । नेपाली महिलाहरू बिशेषरूपले पूजाअर्चना गरेर कृष्णाष्टमी मनाइरहेका छन् । अधिकांश नेपाली महिला आज ब्रत बस्ने गर्दछन् । कपन क्षेत्रका महिलाहरू पनि बिहानैदेखि मन्दिर र पूजाआजामा ब्यस्त छन् । कपन ६ को पूरानो कृष्ण मन्दिरदेखि कपन १ राधाकृष्ण मन्दिरसम्म सबै धार्मिक स्थलमा भक्तजनको भिडभाड रहेको छ ।

हिन्दूहरूले श्रीकृष्ण जन्माष्टमीमा भगवान श्रीकृष्णको पूजा-आराधना गरी श्रद्धा-भक्तिपूर्वक मनाउँछन्। ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई श्रीकृष्ण जन्माष्टमी र रातलाई मोहरात्री भनिन्छ। जन्माष्टमीका दिन अधिराज्यका कृष्ण मन्दिरहरूमा भगवान् श्रीकृष्णको पूजा-आराधना, प्रवचन, भजन-कीर्तन गर्नुका साथै विशेषगरी महिलाहरू ‘व्रत’ बसी रातभर जाग्राम बस्ने चलन छ।

अन्याय, अत्याचार र राक्षसी प्रवृत्तिबाट मानवमात्रको संरक्षण गर्न भगवान् विष्णुको आठौं अवतारको रूपमा जन्मेका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गर्नुभएको थियो। कुरुक्षेत्रमा कौरबहरूसँगको लडाइँमा संलग्न पाण्डवहरूमध्येका अर्जुनलाई उपदेश दिने क्रममा स्वयं उहाँका मुखारविन्दबाट व्यक्त ‘श्रीमद्भागवत गीता’ हिन्दूहरूको पवित्र ग्रन्थ मानिन्छ। बाल्यकालदेखि नै आफ्ना विचित्र लीला देखाएका श्रीकृष्णले पुतना, कंश, जरासन्ध, शिशुपालजस्ता दानवी प्रवृत्तिको संहार गर्नुभएको थियो । जन्माष्टमीमा पाटनको मंगलबजारस्थित प्रसिद्ध कृष्ण मन्दिरमा ठूलो मेला लाग्छ। यसै उपलक्ष्यमा काठमाडौंलगायत मुलुकका विभिन्न नगरका विभिन्न धार्मिक संघ/संस्थाहरूद्वारा श्रीकृष्णको झाँकीसहित शोभायात्रा निकालिने चलन छ।