माघ २४ गतेका लागी तय भएको राष्ट्रियसभाको निर्वाचनका लागि आज मनोनयन दर्ता हुँदैछ। सातवटै प्रदेशका उच्च अदालत रहेका स्थानमा आज बिहान १० बजेदेखि बेलुका ४ बजेसम्म मनोनयन दर्ता गरिने छ।
५९ सदस्यीय राष्ट्रि सभामा ५६ सिटका लागि मनोनयन दर्ता हुँदैछ। बाँकी तीनजना सरकारको सिफारिसमा राष्ट्रपतिले मनोनीत गर्ने व्यवस्था छ।
निर्वाचन कार्यालयले बुधबार बेलुका ४ देखि ५ बजेसम्म उम्मेदवार दर्ता सूची प्रकाशन गर्ने छ भने माघ ११ र १२ गते बिहान १० देखि ५ बजेसम्म उम्मेदवार उपर दाबी विरोध उजुरी दर्ता गर्न सकिनेछ।त्यसैगरी माघ १३ गते १० बजेदेखि ५ बजेसम्म उम्मेदवार विरुद्ध दाबी विरोध उपर निर्णय लिने र माघ १४ गते १० देखि १ बजेसम्म उम्मेदवारको अन्तिम नामावली प्रकाशन गरिनेछ।
माघ १५ गते दिउँसो १ बजेदेखि २ बजेसम्म उम्मेदवार नामावली फिर्ता दिने, ३ बजेदेखि ४ बजेसम्म राष्ट्रियसभा सदस्य उम्मेदवारको अन्तिम नामावली प्रकाशन गरिने र बेलुकी ४ देखि ५ बजेसम्म उम्मेदवारलाई निर्वाचन चिह्न दिने कार्यतालिका रहेको छ। माघ २४ गते बिहान १० देखि ३ बजेसम्म मतदान हुने छ ।
राष्ट्रियसभा सदस्य चुनावमा ५ सय ५० जना प्रदेशसभा सदस्य र १५ सय ६ जना गाउँपालिका तथा नगरपालिकाका प्रमुख, उपप्रमुख गरी २ हजार ५६ जना मतदाता छन्।
