प्रम देउवाद्वारा फाल्गुनन्द जयन्तीको शुभकामना

कपन अनलाइन 

काठमाडौँ, २५ कात्तिक । प्रधानमन्त्री शेरबहादुर देउवाले राष्ट्रिय विभूति एवं किराँत धर्मका महागुरु फाल्गुनन्दको जन्मजयन्तीका अवसरमा स्वदेश तथा विदेशमा रहेका सम्पूर्ण किरात धर्मावलम्बीहरूमा सुख, शान्ति र समृद्धिको शुभकामना व्यक्त गरेका छन । महागुरु फाल्गुनन्द किराँत धर्मका महान् गुरु हुनुका साथै समाज सुधारकसमेत भएका र किरात धर्म, संस्कार र संस्कृतिको उत्थान तथा संरक्षणका निमित्त उनले दिएका योगदान उल्लेखनीय रहेको प्रधानमन्त्री देउवाको शुभकामना सन्देशमा उल्लेख छ ।

प्रधानमन्त्री देउवाले सन्देशमा भनिएको छ— “नेपाल विविध धर्म र संस्कृतिको संगमस्थल हो, लोकतन्त्रको छहारीमा मात्र मुलुकमा नागरिक अधिकारको रक्षा हुने हुँदा सबै धर्म र संस्कृतिले महत्व पाउन सम्भव छ । यसका लागि मुलुक प्रतिनिधिसभा र प्रदेशसभाको निर्वाचनतर्फ अग्रसर भइसकेको हालको परिप्रेक्ष्यमा निर्वाचनमा सहभागी भएर यसलाई सफल पार्न म सम्पूर्ण नेपाली दिदीबहिनी दाजुभाइमा हार्दिक अनुरोध गर्दछु ।”

धार्मिक, सामाजिक सुधार र अनुशासित आचरणका लागि महागुरु फाल्गुनन्दले देखाउनुभएको मार्ग आजको सन्दर्भमा पनि हामी सबैको लागि उत्तिकै अनुशरणीय रहेको उनले भने । प्रधानमन्त्री देउवाले विविध धर्म र संस्कृतिका धनी सबै नेपालीलाई एउटै मालामा जोड्दै राष्ट्रिय एकता कायम गर्न महागुरु फाल्गुनन्दको दर्शन सर्वउपयोगी हुनेछ भन्दै महागुरु फाल्गुनन्दप्रति श्रद्धा व्यक्त गर्दै स्मरण गरेका छन ।