शान्ति प्रक्रियाको सफलताबारे विश्व समुदायलाई जानकारी दिन्उछौं : महरा

कपन अनलाइन 

काठमाडौँ, २ असोज । उपप्रधान एवं परराष्ट्रमन्त्री कृष्णबहादुर महराले संयुक्त राष्ट्रसंघको ७२औँ महासभामार्फत नेपालको शान्ति प्रक्रियाको अवस्थाका बारेमा विश्व समुदायलाई स्पष्ट पारिने बताएका  छन । प्रधानमन्त्री शेरबहादुर देउवा महासभामा भाग लिन यही असोज ३ गते संयुक्त राज्य अमेरिका प्रस्थान गर्ने सिलसिलामा रासस समाचारदाता भीष्मराज ओझासँग आइतबार आफ्नै कार्यकक्षमा कुरा गर्दै उनले विश्वले बुझ्ने गरी नेपालको शान्ति प्रक्रिया सफलरुपमा टुंगिएको जानकारी गराइने बताए ।

प्रधानमन्त्री देउवा राष्ट्र संघको ७२औँ महासभामा भाग लिन यही असोज ३ गते २० सदस्यीय उच्चस्तरीय नेपाली प्रतिनिधिमण्डलको नेतृत्व गर्दै न्युयोर्क प्रस्थान गर्नेछन्। प्रधानमन्त्री देउवाले यही सेप्टेम्बर २३ मा महासभालाई सम्बोधन गर्नेछन् । “केही पश्चिमा मुलुकले नेपालको शान्ति प्रक्रियाको संक्रमणकालीन न्यायको विषयमा कुरा उठाएका छन्, हामी त्यस सम्बन्धमा नेपालको शान्ति प्रक्रिया सफलरुपमा अघि बढेको र त्यो अनुपम रहेको कुरा राख्छौँ, यो महत्वको विषयलाई विश्व समुदायसामु जानकारी गराउने हामीलाई अवसर पनि हो”, उनले भने ।

सोही सिलसिलामा अतिकम विकसित र भूपरिवेष्टित मुलुकका तर्फबाट महासभामा पेश गरिने संयुक्त घोषणापत्र तयारीको उच्चस्तरीय छलफलमा समेत नेपालको सहभागिता महत्वपूर्ण रहने उपप्रधानमन्त्री महराको धारणा थियो । यो बैठकले अतिकम विकसित मुलुक र भूपरिवेष्टित मुलुकले विश्व बजारमा पाउने व्यापार र पारवहन सुविधासम्बन्धी अन्तर्राष्ट्रिय अधिकारबारे संयुक्त घोषणापत्र तयार गर्नेछ । उनि महासभामा भाग लिने क्रममा आइतबार नै न्युयोर्क प्रस्थान गरिसकेका  छन ।

परराष्ट्रमन्त्री महराले सेप्टेम्बर २१ मा त्यहाँ आयोजना हुने सार्क मन्त्रिस्तरीय बैठकको अध्यक्षता गर्नेछन् । सार्कको मन्त्रिस्तरीय बैठक बस्न नसकेको सन्दर्भमा यस बैठकलाई नेपालले ठूलो उपलब्धिका रुपमा लिएको छ । उपप्रधानमन्त्री महरा राष्ट्र संघको सुरक्षा परिषद्द्वारा आयोजित राष्ट्र संघको शान्ति स्थापनामा सुधारसम्बन्धी उच्चस्तरीय खुला छलफलका साथै राष्ट्र संघका महासचिवले आयोजना गर्ने यौन शोषण र दुव्र्यवहारबाट संरक्षण, दिगो विकासका लागि खानेपानी, मानव बेचबिखन, बालश्रम र बँधुवा मजदुर प्रथा अन्त्य विषयका उच्चस्तरीय बैठक तथा छलफलमा सहभागी हुनेछ ।

महासभाका दौरान न्युयोर्कमा रहँदा प्रधानमन्त्री देउवाले सेप्टेम्बर २१ मा अफगानिस्तानका राष्ट्रपति मोहम्मद असरफ घानी, श्रीलंकाका राष्ट्रपति मैत्रीपाला सिरिसेना, बंगलादेशका प्रधानमन्त्री सेख हसिना र पाकिस्तानका प्रधानमन्त्री सहिद खान अब्बासीसँग द्विपक्षीय भेटवार्ता गर्ने उपप्रधानमन्त्री महराले जानकारी दिए । सोही दिन प्रधानमन्त्री देउवाले कोलम्बिया विश्वविद्यालयको विश्व नेतृत्व मञ्चलाई सम्बोधन गर्ने कार्यक्रम तय भएको छ ।

प्रधानमन्त्री देउवा सेम्टेम्बर २४ मा ओमनको मस्कटका लागि प्रस्थान गर्नेछन् । त्यहाँ उनले खाडी क्षेत्रका नेपाली कूटनीतिक नियोगका प्रमुखलाई नेपाल र नेपाली आप्रवासी कामदारको हित र सुरक्षाबारे निर्देशन दिने कार्यक्रम रहेको उपप्रधानमन्त्री महराले बताए । नेपालले राष्ट्र संघीय मानवाधिकार परिषद्को सदस्यमा उम्मेदवारी दिएको र महासभा बैठकका क्रममा नेपालको पक्षमा समर्थन खोजिने उनले जानकारी गराए । प्रधानमन्त्री देउवा नेतृत्वको प्रतिनिधिमण्डल सेप्टेम्बर २८ मा स्वदेश फर्कने कार्यक्रम छ ।