ठाकुरप्रसाद खकुरेल र ध्रुव नेपाल विधिवत एमाओवादीमा प्रवेश गरे

कपन अनलाइनएमालेमा रहेर पनि लामो समयदेखि असन्तुष्ट रहेका कपन एमालेका हस्ति भनेर चिनिने ठाकुरप्रसाद खकुरेल विधिवत एमाओवादीमा प्रवेश गरेका छन् । आज पेरिसडाँडामा आयोजित एक कार्यक्रममा अध्यक्ष प्रचण्डका हातबाट टीका लगाउँदै उनी एमाओवादी बने । ।
चैत्र २४ गते राति नेकपा एमाले कपन गाउँ कमिटिको सातौ अधिवेशनको बन्द सत्रमा अब एमालेबाट विश्राम लिएँ भन्ने सम्बोधनका साथ हिँडेका ठाकुरप्रसाद खकुरेल एमाओवादीमा ३ महिना अघि नै प्रवेश गर्ने पक्का भैसकेको थियो । विविध प्राविधिक कारणले प्रवेश कार्यक्रम ढिलो भएको कुरा उनलाई एमाओवादीमा प्रवेश गराउन प्रमुख भूमिका खेल्ने एमाओवादी नेता सञ्जय अर्यालले कपन अनलाइनलाई बताए ।
नेकपा एमालेको राष्ट्रिय राजनीतिमा देखिएको न्यून प्रभाव साथमा स्थानीय नेताहरुसँग लामो अन्र्तर्विरोधले केही समयदेखि ठाकुरप्रसाद खकुरेल एमाले भएर पनि सक्रिय थिएनन् । उनीसँग एमाओवादीमा प्रवेश गर्नेहरुमा उनकै सुपुत्र विष्णु खकुरेल पनि थिए । त्यसैगरी नेकपा एमालेका पूर्व गाउँ कमिटि सचिव तथा कपन एमालेका अर्का प्रभावशाली व्यक्ति ध्रुव नेपाल पनि आजै एमाओवादी प्रवेश गरेका छन् । उनीहरु काठमाडौं क्षेत्र नं. ४ का प्रभावशाली एमाले नेता गोविन्द अधिकारी नेतृत्वमा समूहगत प्रवेश गरेका हुन् । यसरी एमाओवादीमा प्रवेश गर्ने अन्य नेताहरुमा कामनपा वडा नं. ७ का परिचित नेता गोपाल पण्डित तथा वडा नं. ८ शशिकुमार पाण्डेलगायतका छन् । आज नेता र कार्यकर्तासहित २२ जनाले एमाले छाडेर एमाओवादी बने । कार्यक्रममा संक्षिप्त बोल्दै ठाकुरप्रसाद खकुरेलले एमालेलाई गाली गरे भने एमाओवादीलाई दुखमा साथ दिएको भन्दै सरहना गरे ।

ठाकुरप्रसाद खकुरेलले एमाले छाडे भन्ने खबर कपन अनलाइनमा प्रकाशित भएपछि यो विषय अत्यन्तै चर्चाको शिखरमा थियो । नेकपा एमाले कपनले एक प्रेश विज्ञप्ति प्रकाशित गरेर यो दुष्प्रचार भनेको थियो । तर कपन अनलाइनसँग बेलबेलामा कुरा हुँदा ठाकुरप्रसाद खकुरेलले एमालेमा बस्ने सम्भावना नभएको भन्दै आएका थिए । यद्यपि कुन पार्टीमा प्रवेश भन्ने कुरा उनले खुलाउन चाहेका थिएनन् । धेरै कपनमा रहेका उनलाई चिन्नेहरु सुरेन्द्र ढकालको ग्रेटर नेपाल भन्ने पार्टीमा प्रवेशको सम्भावना रहेको बाताउँदै आएका थिए । यो प्रसंगमा एमाओवादी नेता सञ्जय अर्यालले भने ठाकुर प्र. खकुरेल एमाले छाडेकोभोलिपल्ट नै कपनअनलाइनलाई उनी एमाओवादीमा आउने पक्का रहेको बताएका थिए ।

आफ्नो एमाओवादी प्रवेशका बारेमा प्रतिक्रिया माग्दा ठाकुरप्रसाद खकुरेलले बोल्न चाहेनन् । अन्र्तवार्ताका लागि समय पनि दिन चाहेनन् भने । त्यसैगरी अर्का प्रभावशाली व्यक्ति ध्रुव राज नेपालले भने आफू आस्थाको राजनीति गर्ने मानिस भएकोले आस्थाको राजनीति जता छ त्यतै लागेको प्रतिक्रिया दिए ।

कपन एमालेबाट दुई जना नेता एमाओवादी प्रवेशपछि एमालेको प्रारम्भिक प्रतिक्रिया दिँदै एमाले कपन सचिव हरेराम ढुंगानाले आजसम्म एमालेले उहाँ(ठाकुरप्रसाद खकुरेल) का लागि आँशु बहायो अब त्यो आँशु प्रतिशोधमा बदलिने जनाए । उनले प्रतिक्रिया जनाउँदै अगाडि भने, एमालेलाई सिध्याउनका निम्ति निहित स्वार्थ बोकेर जानेलाई समयले उचित जवाफ दिनेछ ।

(ठाकुरप्रसाद खकुरेलले एमाले छाडेर एमाओवादी प्रवेशसँगै कपनको राजनीतिमा पर्ने विविध प्रभाव र असरका बारेमा कपन अनलाइनले भोलि समाचार प्रकाशन गर्नेछ साथै )

– केशव पाठक, बसन्त गौतम