युवा संघ नेपालको अध्यक्ष मा महेश वस्नेत विजयी , आज भएको झडपमा नव निर्वाचित उपाध्यक्ष राजु गुरुङ सहित ३ जना घाइते

बुटवल, फागुन १६ – मंगलबार राति नेकपा एमालेको युवा संगठन युवा संघ नेपालका कार्यकर्तावीच झडप भएको छ । झडपका क्रममा नव निर्वाचित उपाध्यक्ष राजु गुरुङ सहित ३ जना घाइते भएका छन् ।
निर्वाचनको मत परिणाम तत्काल औपचारिक घोषणा गर्न माग गर्दै नारावाजी गर्ने अध्यक्ष महेश बस्नेत समर्थक र आचार्य समर्थकबीच झडप भएको हो । झडपपछि स्थितिलाई नियन्त्रणमा लिन प्रहरीले लाठि चार्ज गरेको थियो ।
घाइते गुरुङ मंगलबार सकिएको महाधिवेशनमा निरज आचार्य प्यानलबाट विजयी उपाध्यक्ष हुन् ।

राति अबेर घोषणा गरिएको मत परिणाम अनुसार ७ सय ४२ मत ल्याएर अध्यक्षमा महेश वस्नेत विजयी भएका छन् । अर्का प्रत्यासी निरज आचार्यले ६ सय १० मत प्राप्त गरेका छन् । परिणाम अनुसार १७ पदाधिकारीमध्ये एकजना उपाध्यक्ष र २ सचिव बाहेक १४ पदाधिकारीमा बस्नेतको प्यानल विजयी भएको छ ।