परराष्ट्रमन्त्रीद्वारा नेपालका लागि गैरआवासीय रादूतसँग अन्तक्र्रिया
कपन अनलाइन
काठमाडौँ, १९ असार । भारत भ्रमणमा रहनुभएका उपप्रधान तथा परराष्ट्रमन्त्री कृष्णबहादुर महराले नयाँ दिल्लीस्थित नेपालका लागि गैर आवासीय राजदूतसँग छलफल गर्नुभएको छ ।
दिल्लीस्थित नेपाली राजदूतावासमा आइतबार गर्नुभएको छलफलमा उहाँले विश्वभरका मित्र राष्ट्रसँगको सम्बन्धलाई उच्च महत्व दिनुका साथै आपसी सहयोग तथा सहकार्यलाई केन्द्रमा राख्नु पर्ने बताउनुभयो ।
पछिल्ला वर्षमा नेपालमा भइरहेको ऐतिहासिक परिवर्तनका विषयमा मित्रराष्ट्रलाई चासो भएको भन्दै उहाँले संविधानसभाले बनाएको संविधान कार्यान्वयनमा आएसँगै नेपालमा शान्ति र प्रजातन्त्रको नयाँ युग सुरु भएको उल्लेख गर्नुभयो ।
वर्तमान संविधान प्रगतिशील तथा अग्रगामी रहेको बताउँदै उपप्रधानमन्त्री महराले संविधानले सबै क्षेत्रका नेपाली समाजको चाहना तथा आकांक्षाको रक्षा गरेको छ भन्नुभयो ।
आफ्ना सबै मित्रराष्ट्रका राजदूतसँग संयुक्त राष्ट्रसङ्घको मानवअधिकार परिषद्मा दरिलो उम्मेदवारी रहेको भन्दै उहाँले सन् २०१७ को अन्त्यतिर हुने निर्वाचनमा समर्थन गर्न आग्रह गर्नुभयो ।
मुलुक सकारात्मक विकासको बाटोमा रहेको भन्दै उहाँले राजनीतिक परिवर्तन, शान्ति प्रक्रिया तथा मानव अधिकारका क्षेत्रमा हासिल गरेको उपलब्धिका विषयमा नेपालले अन्तर्राष्टिय समुदायसँग अनुभव बाँड्न चाहेको बताउनुभयो ।
सो अवसरमा सहभागी राजदूतले नेपालले प्राप्त गरेको उपलब्धिमा शुभकामना व्यक्त गर्दै शान्ति र प्रजातन्त्र तथा नेपालसँग थप द्विपक्षीय सम्बन्ध विकासको अपेक्षा गरेको भारतस्थित नेपाली दूतावासले जनाएको छ । परराष्ट्रमन्त्री महराले गैरआवासीय राजदूतसँगको छलफललाई आज पनि निरन्तरता दिने कार्यक्रम रहेको छ । रासस