सर्वोत्कृष्ट राष्ट्रपति पुरस्कार हुसेनलाई

कपन अनलाइन 

काठमाडौँ, ३० जेठ । यस वर्षको उत्कृष्ट राष्ट्रपति कृषक पुरस्कार सर्लाहीका माछापालक कृषक अफजल हुसेनलाई प्रदान गरिएको छ ।
रु दुई लाख राशिको उक्त पुरस्कार आज कृषि विकास मन्त्रालयमा राष्ट्रिय किसान आयोगका अध्यक्ष चित्रबहादुर श्रेष्ठले हुसेनलाई प्रदान गर्नुभएको हो ।

कृषि पेसालाई समाजको आकर्षक एवम् सम्मानित पेसाका रुपमा स्थापित गर्न सहयोग पु¥याउने उद्देश्यबाट २०७० सालदेखि यो पुरस्कार वितरण गरिँदै आएको छ ।

सर्वोत्कृष्ट एक र उत्कृष्ट चार जनालाई जनही रु एक लाखरुपैया राशिको उक्त पुरस्कार पत्रकारिता पेसा छोडेर कृषिमा लागेका थमबहादुर रजाली मगर, कृषि विषय पढेर कृषिमा लागेका सुमेरसम्शेर जबरा, विदेश जानबाट रोकिएकी इन्द्रकुमारी लावती र रोजेर कृषि पेसा गरेका खडकसिंह विष्टलाई प्रदान गरिएको छ ।

नवलपपरासी रजाली टोलका रजालीलाई उत्कृष्ट तरकारीखेती, डडेल्धुरा अजमेरु–४ का विष्टलाई बाख्रापालन, पाँचथर कुरुम्बा मिक्लाजुङ्का लावतीलाई सुन्तला एवम् एकीकृत खेती र बाँके–५ का जबरालाई मत्स्य प्रजनन्मा उत्कृष्ट योगदान पु¥याएबापत पुरस्कृत गरिएको हो ।

कार्यक्रममा आयोगका अध्यक्ष श्रेष्टले सरकारले लगानीको निरन्तर अनुगमन गर्ने हो भने कृषिमा पर्याप्त प्रतिफल प्राप्त हुने विश्वास व्यक्त गर्नुभयो ।

कार्यक्रममा सर्वोत्कृष्ट पुरस्कार ग्रहण गर्ने हुसेनले लगनशील भएर कृषि पेसामा लाग्दा राम्रै परिणाम निस्कने बताउनुभयो ।

कार्यक्रममा कृषि विकास मन्त्रालयका सचिव डा सुरज पोखरेल, पशुपक्षी विकास मन्त्रालयका सचिव युवकध्वज जिशीले सरकारी अनुदानलाई सदुपयोग गर्दे अगाडि बढ्ने किसानको हित सुनिश्चित छ भन्नुभयो । रासस