महाबौद्ध अनाथ विद्यापीठ आर्थिक अभावमा बन्द हुने अवस्थामा
कपन अनलाइन
नवलपरासी, २९ जेठ । नवलपरासीमा रहेको एकमात्र अहिंसावादी महाबौद्ध अनाथ विद्यापीठ यतिबेला आर्थिक अभावमा बन्द हुने अवस्थामा पुगेको छ ।
काठमाडौँ बाहिरको बौद्ध शिक्षा अध्ययन हुने एकमात्र विद्यापीठमा हाल आर्थिक सङ्कट परेपछि बन्द हुने अवस्थामा पुगेको हो । मासिक रु पाँच लाखसम्म खर्च लाग्ने यस विद्यालयमा हाल आर्थिक अभाव हुँदा निकै समस्या परेको विद्यालयकी प्राचार्य सानुमाया पार्खिनले बताउनुभयो ।
जिल्लाको दाउन्ने डाँडामा स्थापित यस विद्यापीठमा विभिन्न २४ जिल्लाका १०२ जना अनाथ बालबालिका आवासीय रुपमा अध्ययनरत छन् । विभिन्न कारणबाट घरपरिवारको संरक्षणमा रहन नसकेका र बिशुद्ध अनाथ बालबालिकालाई बौद्ध शिक्षा प्रदान गर्ने उद्देश्यले २०५५ सालदेखि विद्यापीठ सञ्चालन गरिएको हो ।
बौद्ध समुदायले सामान्य पूजापाठ र भिक्षादान साथै मुठ्ठी दानको सहयोगबाट सञ्चालन हुँदै आएका यस विद्यापीठमा अहिले आर्थिक अभाव भएको छ ।
प्राचार्य सानुमाया पार्खिनले भन्नुभयो “अहिले बालबालिकालाई खानको समेत समस्या साथै अध्ययन गराउन रकम अभावमा शिक्षकको समस्या छ ® हाल यस विद्यापीठमा निजी स्रोतबाट सामान्य खाजा खर्चमा ११ जना शिक्षक रहँदै आएका छन् । विद्यापीठमा कक्षा ८ सम्मको पठाइ हँुदै आएको छ ।
यस विद्यापीठमा हाल रसुवा, धादिङ, पाँचथर, चितवन, नुवाकोट, गोर्खा, रामेछाप, दोलखालगायतका विभिन्न २४ जिल्लाका अनाथ बालबालिकाले बौद्ध शिक्षा अध्ययन गर्दै आएका छन् । रासस
