संविधान कार्यान्वयनका लागि निर्वाचन आवश्यक – नेता खनाल

कपन अनलाइन 

विराटनगर, १२ फागुन । नेकपा (एमाले)का वरिष्ठ नेता झलनाथ खनालले संविधान कार्यान्वयनका लागि स्थानीय निर्वाचन आवश्यक रहेको बताउनुभएको छ ।

विराटनगर विमानस्थलमा आज अपराह्न पत्रकारहरुसँग कुराकानी गर्दै उहाँले नेपाली जनताको माग र एमालेको दबाबमा स्थानीय निर्वाचन हुन गइरहेको दाबी गर्नुभयो ।

संविधान संशोधन प्रस्ताव कुबेलाको बाजासरह रहेको प्रसङ्ग उल्लेख गर्दै उहाँले कुनैपनि हालतमा संविधान संशोधन हुन नदिने दृढता प्रकट गर्नुभयो ।

प्रदेशको सीमाङकनलाई तलमाथि गर्ने अधिकार वर्तमान संसदलाई नरहेको उल्लेख गर्दै नेता खनालले नयाँ प्रतिनिधिसभाले मात्र संविधानको संशोधन गर्न सक्ने धारणा राख्नु भयो ।

मुलुकमा लोकतन्त्रलाई संस्थागत गर्न मधेसी मोर्चालाई दृढतापूर्वक निर्वाचनमा सहभागी हुन आह्वान गर्दै उहाँले भन्नुभयो, “तराई–मधेसको जनताको हक खोजेको छ भने निर्वाचनमा सहभागी हुनुपर्दछ ।”

संविधान कार्यान्वयनका लागि निर्वाचन महत्वपूर्ण खुड्किलो– अध्यक्ष गच्छदार

मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले स्थानीय निर्वाचन संविधान कार्यान्वयनको महत्वपूर्ण खुड्किलो रहेको बताउनुभयो ।

विराटनगर विमानस्थलमा आज अपराह्न सञ्चारकर्मीसँग कुरा गर्दै उहाँले तोकिएको समयभित्रै परिमार्जनसहित संविधान संशोधनको प्रस्ताव पारित गरी मधेसी, थारु र आदिवासीको अधिकार सुनिश्चित गर्नुपर्ने सुझाव दिनुभयो ।

उहाँले मधेसी मोर्चालाई पनि निर्वाचनमा सहभागी गराएर निर्वाचनलाई सफल बनाउनुपर्ने अन्यथा मधेसी मोर्चाबाहेकको निर्वाचन नाम मात्रको निर्वाचन हुनेतर्फ सचेत गराउनुभयो । रासस