जलको वास्तविक अवस्था बुझ्न नेपाली टोली भारत र बङ्गलादेशमा

कपन अनलाइन 

नवलपरासी, ६ फागुन । जलको वास्तविक अवस्था बुझ्न एक नेपाली टोली भारत हुँुदै बङ्गलादेशको यात्रा सुरु गरेको छ । बाह्र सदस्यीय अनुगमन टोली भारत हुँदै बङ्गलादेशमा जान लागेको हो ।

बुधबार यहाँबाट प्रस्थान गरेकोे टोली अहिले भारत पुगेको टोलीमा सहभागी जलअभियानकर्मी नारायण भण्डारीले जानकारी दिनुभयो । अन्तरदेशीय नदीमा जल सुशासनका लागि जल पदयात्रा दुई साताको रहने छ ।

सो टोलीमा जल अभियानकर्मी, गण्डक पीडित समुदायका प्रतिनिधि, गण्डक क्षेत्रमा काम गर्ने सामाजिक सङ्घसंस्थाका प्रतिनिधि छन् । टोलीले भारत र बङ्गलादेशका जलको वास्तविक अवस्था, जल अधिकारको अवस्था, एक देशले अर्को देशलाई गर्न सक्ने जलसम्बन्धी सहयोगबारे छलफल गर्ने गण्डक नदी सङ्घर्ष समितिका अध्यक्ष रामवरण केवटले जानकारी दिनुभयो ।

सो टोली एक देशबाट अर्को देश हुँदै बग्ने नदीको माथिल्लो तथा तल्लो तटीय अधिकारका लागि जागरण ल्याउने उद्देश्यले नेपालबाट भारत हुँदै बङ्गलादेशको राजधानी ढाकासम्म पुग्ने छ । भ्रमणका लागि नेपाली टोलीलाई एक्सन एडले आर्थिक सहयोग गरेको हो ।

विसं २०१६ मा भएको गण्डक सम्झौताअनुसार नेपाली पक्षले लाभ लिन नसकेको र पानीको बाँडफाँड सन्तुलित नभएको र भारतले सम्झौता कार्यान्वयनमा उदासीनता देखाएको भन्दै सम्झौता कार्यान्वयनका लागि दबाब दिनसमेत सो अभियान गर्न लागिएको अध्यक्ष केवटले बताउनुभयो ।

गण्डक क्षेत्रअन्तर्गत पर्ने ४० हजार हेक्टर क्षेत्रफल सिञ्चित हुनुपर्ने सम्झौतामा रहे पनि भारतले निर्माण भएको संरचनाअनुसार अहिले २५ हजार हेक्टर क्षेत्रफल मात्र सिञ्चित भइरहेकाले पूर्ण सिञ्चित क्षेत्र बनाउनका लागि पहल गर्नुपर्ने अवस्था छ ।

महायज्ञमा एक करोड १५ लाख नगद रकम सङ्कलन

नवलपरासीमा सञ्चालित श्रीमद्भागवत धान्याञ्चल ज्ञान महायज्ञमा करिब रु एक करोड १५ लाख नगद रकम सङ्कलन भएको छ ।

नवलपरासीको देवचुली नगरपालिकामा गत माघ २७ गतेदेखि आयोजित महायज्ञमा सो नगद रकम सङ्कलन भएको महायज्ञमा आयोजक समितिका अध्यक्ष दिनेश भुसालले बताउनुभयो ।

महोत्सवमा करिब १५० मुरी धान र रु एक लाख ५० हजार बराबरका जिन्सी सामग्री सङ्कलन भएको र महायज्ञबाट सङ्कलित रकमबाट सो स्थलमा नागस्थान एवम् नागको मन्दिर निर्माणलगायत बाल उद्यानको विकास गरिने आयोजकले जनाएको छ ।

पाँच वर्षपछि कैदी पक्राउ

कैद फैसला भई फरार भएको पाँच वर्षपछि एक कैदीलाई प्रहरीले पक्राउ गरेको छ । कावासोती नगरपालिका–८ बस्ने वर्ष २४ को विनोद खतिवडालाई प्रहरीले उनको घर नजिकैबाट पक्राउ गरेको हो ।

विसं २०६८ मा वन पैदावार मुद्दामा पाँच महिना १४ दिन कैद फैसला हुँदा फरार खतिवडालाई बिहीबार प्रहरीले पक्राउ गरेको थियो ।निजलाई प्रहरीले बिहीबार नै जिल्ला अदालत उपस्थित गराइएकामा जिल्ला कारागार चलान गरिएको थियो । रासस