सञ्चारकर्मीले राष्ट्रिय स्वाधीनताको पक्षपोषण गर्नुपर्छ– महासचिव पोखरेल
काठमाडौँ, १६ जेठ । नेकपा (एमाले) का महासचिव ईश्वर पोखरेलले सञ्चारकर्मीले राष्ट्रिय स्वाधीनताको पक्षपोषण गर्नुपर्ने बताउनुभएको छ ।
युवा सङ्घ नेपालद्वारा प्रेस चौतारी नेपालको नयाँ कार्य समितिलाई स्वागतका लागि आयोजित कार्यक्रममा उहाँले पत्रकारले व्यावसायिक दक्षता हासिल गर्नुपर्नेमा जोड दिँदै संविधानको रक्षा र त्यसको कार्यान्वयनका लागि सक्रिय रहन आग्रह गर्नुभयो ।
महासचिव पोखरेलले मुलुकको स्वाभिमानको शिरलाई दुई शताव्दी अगाडि भएको असमान सुगौली सन्धिबाट झुकाइएको बताउँदै अहिले सरकारको दृढताका कारण त्यसलाई उठाउने काम भएको विचार व्यक्त गर्नुभयो ।
प्रेस चौतारी नेपालका अध्यक्ष गणेश बस्नेतले आफ्नो संस्थाको सिफारिसमा सरकारले बजेटमा पत्रकारलाई सरकारी अस्पतालमा ५० प्रतिशत छुटको व्यवस्था गरेकोमा त्यसको सराहना गर्नुभयो ।
युवा सङ्घ नेपालका अध्यक्ष राजीव पहारीले श्रमजीवी पत्रकारले न्यूनतम पारिश्रमिक प्राप्त गर्न नसकेको अवस्थामा त्यसलाई चौतारीको नयाँ कार्यसमितिले कार्यान्वयनका लागि भूमिका निर्वाह गर्नुपर्नेमा जोड दिनुभयो ।सङ्घका प्रवक्ता प्रभात विक्रम कटुवालले समाजमा भए गरेका विभिन्न घटनालाई यथार्थ चित्रण गरी समाजलाई सुसुचित गर्न सञ्चारमाध्यमको भूमिका महत्वपूर्ण हुने बताउनुभयो । रासस
फोटो : पुन्यराज पुडासैनीको फेसबुक बाट
