सिरियाली सरकारको गढमा बम आक्रमण, १२० जनाको मृत्यु !!!
कपन अनलाइन, बेरुत, १० जेठ, २०७३
सिरियाली सरकारको गढ मानिएका दुई छुट्टाछुट्टै स्थानमा सोमबार इश्लामिक स्टेट (आइएस) समूहद्वारा गराइएका विस्पोटमा परी कम्तिमा १२० जनाको मृत्यु भएको छ । घटनामा सयौंको संख्यामा घाइते भएका छन् । विस्पोटमा परी जावलेह शहरमा ७३ जनाको मृत्यु भएको र यसबाट अझ दक्षिणमा अवस्थित टारटस शहरमा ४८ जनाको ज्यान गएको सिरियाली मानव अधिकारवादी संस्थाले जनाएको छ ।
प्राप्त समाचार अनुसार उक्त स्थानमा सोमबार बिहानै झण्डै सात आत्मघाती विस्पोट गराइएको थियो । संस्थाका प्रमुख रमि अब्देल रहमानले सिरियामा सन् २०११ पछि भएका केही ठूला हमलामध्ये सोमवार भएका आक्रमण पनि भएको बताउनुभएको छ । आइएस समूहले घटनाको जिम्मेवारी आफ्नो समाचार संस्था अमाक न्यूज एजेन्सी मार्फत लिएको छ ।
दुवै शहर सिरियाली सत्तापक्षको पकड रहेको इलाका हुन् । सिरियाली राष्ट्रपति बसार अल असादको परिवार जावेलेहबाट २५ किलोमिटर पूर्व कार्दहबाट दमास्कस आएको हो । उक्त इलाकामा मुख्यतया अलावित नामक सिया समुदायको बसोबास रहँदै आएको छ । सिरियाको तटीय क्षेत्रमा आइएसको उपस्थिती नभएको मानिन्छ तर यसको जिहादी विरोधी समूह र अलकायदाको स्थानीय समूह अल नुस्रा फ्रन्टको प्रभुत्व रहेको छ । रासस
(फाइल फोटो)
