नेपाली काँग्रेस सरकारमा जान हतारिएको छैन

कपन अनलाइन, वालिङ, १० जेठ, २०७३

नेपाली काँग्रेसका केन्द्रीय सदस्य एवम् सांसद गोपालमान श्रेष्ठले नेपाली काँग्रेस सरकारमा जान नहतारिएको बताउनुभएको छ । ‘संविधानको सफल कार्यान्वयनका लागि पनि अहिले राष्ट्रिय सरकारको आवश्यकता छ’ काँग्रेस स्याङ्जा क्षेत्र नंं. २ ले आज वालिङमा आयोजना गरेको कार्यकर्ता भेटभाट कार्यक्रममा नेता श्रेष्ठले भन्नुभयो, “जारी संविधानको कार्यान्वयनका लागि पनि नेपाली काँग्रेस बढी जिम्मेवार हुनु आवश्यक छ ।”

मधेसमा जारी आन्दोलन अहिले राजधानी केन्द्रित भएकाले मधेसीका जायज मागलाई दबाउनेभन्दा पनिसरकारले छिटो सम्बोधन गर्नुपर्नेमा नेता श्रेष्ठको जोड थियो । नेपाली काँग्रेस स्थानीय निकायको निर्वाचनबाट नभाग्ने बताउँदै नेता श्रेष्ठले त्यसका लागि आवश्यक तयारीमा रहन नेता तथा कार्यकर्ताहरुलाई आग्रह गर्नुभयो । रासस