बस दुर्घटनामा चौँतीस घाइते बाह्रको अवस्था चिन्ताजनक

चौतारा, २ पुस । चौताराबाट बाह्रबिसेतर्फ जाँदै गरेको बा२ख ४८१५ नंको यात्रुबस दुर्घटना हुँदा ३४ जना घाइते भएका छन् । बाह्र जनाको अवस्था चिन्ताजनक रहेको छ ।

घाइते सबैलाई चौतारा अस्पताल तथा काभ्रेको धुलिखेल अस्पतालमा लगिएको जिल्ला प्रहरी कार्यालयका प्रमुख प्रहरी नायब उपरीक्षक विश्व अधिकारीले बताउनुभयो ।

सिन्धुपाल्चोकको सदरमुकाम चौताराबाट आज अपराह्न ४ बजे छुटेको उक्त बस साँगाचोक गाविसको जनजागृति उमावि नजिकको घुम्तीमा ४.४५ बजे दुर्घटना भएको थियो ।

घटनास्थलमा उद्धारकार्य सकिएको र अन्य यात्रुलाई अर्को बसमार्फत बाह्रबिसे पठाउने पहल भइरहेको प्रहरी नायब उपरीक्षक अधिकारीले बताउनुभयो ।

बसमा भित्र र छतमा समेत करिब ७० जना यात्रु रहेको र ओरालोतर्फ जाँदै गरेको सो बस तीव्रगति र क्षमताभन्दा बढी यात्रु भएकाले सडकमै पल्टिएको प्रहरीले जनाएको छ ।