व्यवस्था : सत्या अधिकारी (लघुकथा)

कपन अनलाइन

काठमाण्डौ ,पुस २८।

‘राजा आऊ, देश बचाऊ  ! गणतन्त्र  मुर्दावाद ! राजतन्त्र जिन्दावाद ।’

सडक नाराले  तातेको थियो । आन्दोलनले उग्र बन्दै  थियो ।  देशप्रेमका गीतहरु बज्दै थिए । नेतृत्व पक्ष अवीर र मालाको भारी बोक्दै थिए । जनसागरलाई सम्बोधन गर्दै नाइके कुर्लन्थे, ‘महिला तथा सज्जनवृन्द ! आज म यो सभा तपाईँ जस्ता भूईँ मान्छेको न्यायको लागि गर्दै छु । यो व्यवस्थाले हाम्रो अवस्था परिवर्तन गर्दैन’ तालीको आवाज पर्रर आउथ्यो । आफ्नो बैंकको ऋण मिनाहा हुने आश्वासनले कार्यकर्ता जुटेका थिए । दिनभरि अपार  भिँडले क्रान्तिकारी परिवर्तनको आह्वान गथ्र्याे । बेलुका हुँदै गएपछि बिस्तारै सेलाउथ्यो ।

आन्दोलनकारीहरूको जोश र फुर्ति देख्दा लाग्थ्यो,  ‘जनताले ल्याएको गणतन्त्र जनताले नै फाल्ने भए । ’

झमक्क  सांँझ परेको  थियो । म  तरकारी किन्न पसल जाँदै थिएँ ।  छेउको भट्टि पसलबाट  आवाज आयो, ‘मेरो पावर देख्नु भयो त ? आन्दोलन सफल पारेर  खरबौँको ऋण मिनाहा गराउने हो ।’

सबै गलल्ल हाँसे । चियर्स भने ।

उनी बक्दै थिए,  ‘ऋण त मिनाहा होस् न !  राजा आउन त  पृथ्वी  फर्किनु पर्छ ।’

सहकार्य : कपन बानेश्वर साहित्यिक साप्ताहिक

तपाइँको प्रतिक्रिया ।