मुलपानी क्रिकेट रंगशालामा एसिसी मेन्स प्रिमियर कप शुरु

कपन अनलाइन

काठमाडौं बैशाख ६।  कागेश्वरी मनोहरा नगरपालिका वडा नं ६ मुलपानीमा रहेको मुलपानी क्रिकेट रंगशालामा  एसिसी  मेन्स प्रिमियर कप   मंगलबार बाट शुरु भएको छ ।

 हङकङ र सिंगापुर बीच भएको उक्त खेलको उद्घाटन कागेश्वरी मनोहरा नगरपालिका प्रमुख उपेन्द्र कार्कीले उद्घाटन गरेका हुन । खेल शुरु हुनु पुर्व  क्यानका पुर्व अध्यक्ष बिनयराज पाण्डे क्यानका कोषाध्यक्ष रोशन सिंह , केन्द्रीय सदस्य प्रशान्त बिक्रम मल्ल लगायतले  मुलपानी क्रिकेट  रंगशाला परिसरमा  क्यानको लोगो समेत अनावरण गरेका थिए ।

पहिलो दिनको उक्त खेलमा हङकङले सिंगापुरलाइ  ८ विकेटले पराजित गरेको छ ।  सिंगापुरले दिएको १ सय ७५ रनको लक्ष्य हङकङले ३३ ओभरमा २ विकेट गुमाएर पूरा गर्यो । बैशाख १८ गते सम्म संचालन हुने उक्त प्रतियोगितामा १० वटा देशको सहभागिता रहेको छ ।

‘एसिसी मेन्स प्रिमियर कप’मा नेपाल समूह ‘ए’ मा परेको छ । नेपालको समूहमा ओमान, कतार, मलेसिया र साउदी अरेबिया छन् । समूह ‘बी’ मा युएई, हङकङ, कुवेत, सिंगापुर र बहराइन छन् ।नेपालले मुलपानी क्रिकेट मैदानमा साउदीअरेबिया संग बैशाख ११ गते खेल्नेछ । उद्घाटन समारोहमा शंखरापुर नगरपालिका प्रमुख रमेश नापित, उप प्रमुख समिता श्रेष्ठ, गोकर्णेश्वर नगरपालिका उप प्रमुख सान्नानी लामा, कागेश्वरी मनोहरा नगरपालिकाका वडा अध्यक्षहरु वडा सदस्यहरु, कर्मचारी , क्यानका पदाधिकारी सहित स्थानीय खेलप्रेमी दर्शकहरुको उपस्थिति रहेको थियो  ।