नेकपा एमालेका वरिष्ठ उपाध्यक्ष ईश्वर पोखरेलको प्रचारमा अभिनेत्री करिष्मा मानन्धर

कपन अनलाइन

काठमाडौं, कात्तिक २७।

नेकपा (एमाले) का वरिष्ठ उपाध्यक्ष ईश्वर पोखरेलको घरदैलोमा अभिनेत्री करिष्मा मानन्धर र चलचित्र निर्देशक तथा निर्माता आकाश अधिकारी मतदाताको घरदैलोमा सहभागी भएका छन  ।

आइतबार बिहान काठमाडौं महानगरपालिका ३ वसुन्धारामा पोखरेलका लागि घरदैलो अभियानमा करिष्मा र आकाश सहभागी भएका हुन ।

आफू पनि काठमाडौं क्षेत्र नम्बर ५ को स्थायी बासिन्दा भएको बताउँदै अभिनेत्री मानन्धरले पोखरेलले यस क्षेत्रको विकासका लागि धेरै काम गरेको र  जनताको माझमा भिजेको नेता पोखरेललाई निर्वाचित गर्न  मतदातासँग आग्रह गरेकी थिइन।

देश विकासको लक्ष्य लिएर अगाडि बढेको एक मात्र पार्टी एमाले रहेको भन्दै अभिनेत्री मानन्धरले एमालेले जिते मात्रै देशले विकासमा काँचुली फेर्न सम्भव हुने प्रतिक्रिया दिएकी थिइन्  ।

एमाले अध्यक्ष केपी शर्मा ओलीको नेतृत्वमा एमालेले जनतामा विकासको अनुभूति गराउन सफल भएको र आगामी सरकारकाे नेतृत्व पुनः एमालेले गर्ने अवसर पाएमा देशले आर्थिक विकास गर्ने उनको भनाइ छ ।

जनताको सदभाव र विश्वासप्रति आफू नतमस्तक रहेको भन्दै पोखरेलले सदैव जनताको सुख दुख र विकासमा आफू साथमा रहने प्रतिबद्धता व्यक्त गरेका थिए । काठमाडौं क्षेत्र नम्बर ५ को प्रतिनिधिसभामा एमालेबाट पोखरेल तथा प्रदेशसभा ५ (१) मा नारायण सिलवाल र ५ (२) मा दीपक निरौला उम्मेदवार रहेका छन ।