कागेश्वरी महादेव मन्दिरमा तीन दिन सम्म मेला लाग्ने ,भोली साहित्यिक कार्यक्रम गरिदै

कपन अनलाइन

काठमाडौँ भाद्र १६।  कागेश्वरी मनोहरा नगरपालिका वडा नं १ गागलफेदीमा रहेको धार्मिक पर्यटकीय स्थल कागेश्वरी महादेव मन्दिरमा तीन दिन सम्म मेला  गरिने भएको छ । कागेश्वरी महादेव मन्दिरमा प्रत्येक बर्षझै भाद्र शुक्ल अष्ट्मीको दिनमा लाग्ने मेलाको अवसर पारेर यस पटक  भोलि १७ गते  देखिनै बिभिन्न कार्यक्रम गरिने भएको छ  । भोलि साहित्यिक कार्यक्रम गर्न लागिएको जानकारी दिदै कागेश्वरी मनोहरा नगरपालिका वडा नं १ का वडा अध्यक्ष मकुन्द प्रसाद गजुरेलले  मेला व्यवस्थापनको लागि सम्पूर्ण तयारी पूरा भएको जानकारी सहित सो   मेलामा  उपत्यका लगायत देशभरका दर्शनार्थीहरुलाई आउन आग्रह गरेका छन ।

सो मेलालाई व्यवस्थित बनाउन कागेश्वरी मनोहरा नगरपालिका प्रमुख  उपेन्द्र कार्कीको संयोजकत्वमा नगर उप प्रमुख शान्ता थापासहित कार्यपालिका सदस्य रहेको १९ सदस्यीय मूल आयोजक समिति निर्माण गरेको वडा अध्यक्ष गजुरेलले जानकारी गराए । मूल आयोजक समितिका साथै मन्दिर ब्यबस्थापन समितिले पनि महत्वपूण जिम्मेवारीका साथ मेला सफल बनाउने भएको छ । आजबाटै नै सरसफाई कार्यक्रम सुरु गरेको समितिले  मेलालाई आकर्षक बनाउन स्थानीय खाद्य उत्पादनको प्रर्दशन तथा विविधि साँस्कृतिक कार्यक्रम गरिने भएको छ ।

 नगरपालिकाको नाम नै कागेश्वरी मनोहरा नगरपालिका भएकाले पनि यस धार्मिक पर्यटकीय स्थललाई नगरपालिकाले विशेष महत्व दिएको छ । यो महामेला ३ दिनसम्म विशेष कार्यक्रम गरी मनाउने महामेला आयोजकले जनाएको छ । तीन दिनसम्म चल्ने महामेलामा आन्तरिक तथा बाह्य क्षेत्रबाट १ लाख ५० हजारजति पर्यटक आउने अनुमान गरिएको छ ।भाद्र शुक्ल अष्ट्मीको  दिन कागेश्वरी महादेव मन्दिर परिसरमा रहेको कुण्डमा स्नान गरि दर्शन गरेमा मनोकामना हुने जन विश्वास रहेको छ साथै यमराजको दुत कागले मानिसलाई छुदा अशुभ हुने र त्यस बाट मुक्त हुन कागेश्वोरी मन्दिर परिसरमा रहेको पोखरीमा स्नान गर्नु पर्ने धार्मिक मान्यता रहेको छ ।

सोहि दिनलाई कागे अष्टमी पनि भनिन्छ । कागेअष्टमी मेलाको दिन गोसाइँकुण्डमा मेला भरेका दर्शनार्थीले त्यहाँ बाट ल्याएको जल कागेश्वोरी महादेबलाई चढाएपछी तीर्थ यात्राको मनोकामना पूरा हुने विश्वास समेत रहिआएको छ ।नयाँ शिष्यलाई कागे अष्टमीका दिन कागेश्वर महादेवलाई साक्षी राखी गुरुमन्त्र दिने गरेको लामा गुरुको धारणा छ । कागे अष्टमीका दिन आफ्नो खेतबारीमा फलेको मकै कागेश्वरीमा महादेवलाई चढाएमा कागले खेतबारीमा गई मकै खाँदैन भन्ने जन विश्वाससमेत रहेको छ ।

अघिल्लो वर्ष कोरोनाको कारण  मेला संचालन हुन सकेको थिएन ।उपत्यकाको मनमोहक दृश्यावली अवलोकन गर्न, स्वच्छ सुन्दर वातावरणको अनुभव लिन तथा आकर्षक ग्रामीण भेग नियाल्नको लागि पनि सो उपयुक्त स्थल रहेको र बार्है महिना आन्तरिक तथा बाह्य पर्यटक आउने वातावरण निर्माणको लागि परेको कागेश्वरी मनोहरा नगरपालिका वडा नं १ का वडा अध्यक्ष मकुन्द गजुरेलले बताए ।