सुत्केरी पीडा

(युवराज पाण्डे)

बनेपा, २१ जेठ । परिवारमा नवजात शिशु जन्मेकाले खुसीको कुनै सीमा थिएन । पाहुनापाछाको भिडभाड पनि त्यत्तिकै थियो, न्वारान भर्खरै सकिन आँटेर खानपानको तयारी हुँदै थियो तर अचानक आएको भूकम्पले घर गल्र्यामगुर्लम ढल्यो, भागदौड मच्चियो ।

काभ्रेपलाञ्चोकको खरेलथोक गाविस वडा नं ४ की ११ दिनकी सुत्केरी नीलम श्रेष्ठलाई रिङ्गटा लागेर ढलेको अनुभूति भयो अनि एकछिनमै नवजात शिशुको खोजी गर्दा त उनको बाबुले दौडाएको जानकारी भयो र अनि मात्रै उहाँलाई भूकम्प आएको थाहा भयो ।

घर भत्किएर सबै खाद्यान्न पुरिएपछि गाईबस्तुका लागि बाहिरै राखिएको मकैको खोले खाएर चार रात कटाएको उल्लेख गर्दै श्रीमती श्रेष्ठले एक सातापछि राहतका रुपमा गएको चामलबाट खाना खाएको र त्यो क्षण खुसीको सीमा नभएको बताउनुभयो । “पहिलो पटक खाँदा त असाध्यै मीठो लाग्यो” उहाँले भन्नुभयो ।

भूकम्पका कारण उहाँको हात मर्केर हाडको समस्या देखिएको छ । भूकम्प गएको झन्डै डेढ महिना बित्न लाग्दा पनि उनीहरुलाई पुनःस्थापना गर्न नसक्दा भुइँको चिसोबाट सुत्केरी आमा, नवजात शिशु र गर्भवती बिरामी पर्न थालेका छन् । चिसोले गर्दा आफ्नो डेढ महिनाको छोरालाई रुघाखोकी र ज्वरोको समस्या आएको जानकारी दिँदै श्रेष्ठले भन्नुभयो – “दिउँसो जस्तापातामुनि सुत्दा जस्ताको ताप र राति भुइँको चिसोले थप समस्या भएको छ ।”

काभ्रेपलाञ्चोक कोसीदेखा गाविस वडा नं २ की गर्भवती शलिना विकको समस्या पनि उस्तै छ । उहाँलाई भूकम्पपछिका कैयौँ रात भुइँमा सुत्दा चिसोले रुघाखोकी लाग्नाका साथै ज्वरो आयो । एक महिनासम्म त्रिपालमुनि बस्नुभएकी नौ महिनाकी गर्भवती विकले अब बच्चा भएपछि वर्षामा के गर्ने भन्ने विषयमा सोच्नै नपाएको गुनासो गर्नुभयो । “ जस्तामुनिकै बास त होला नि ” उहाँले भन्नुभयो । गाउँका छिमेकीसँग मागेर भए पनि खाना खानुभएका उहाँले आफूजस्ता महिलालाई सरकारले प्राथमिकतामा राखेर काम गरिदिए हुन्थ्यो भन्ने माग गर्नुभयो ।

महिला तथा बालबालिका कार्यालयकी निर्मला कार्कीले सुत्केरी तथा गर्भवतीलाई लक्ष्य गरेर जिल्लामा पोषणयुक्त राहत वितरण गरिएको जानकारी दिँदै उहाँले सो अभियान जिल्लाभरि सञ्चालन हुने बताउनुभयो । उहाँका अनुसार सुत्केरी र गर्भवतीका लागि दुई ‘क्रेट’ अन्डा, आधा किलोग्राम घिउ र शिशुका लागि कम्बल वितरण भएको छ ।

जिल्लामा ८८ महिलाको भूकम्पका कारण गर्भ तुहिएको बताइएको छ । कार्कीले जिल्लामा भूकम्पका कारण चार हजार ६९७ महिला तथा गर्भवती प्रभावित भएको र यो तथ्याङ्क अझै बढ्ने बताउनुभयो । रासस