वार्षिक लक्ष्य पूरा गर्न गाह्रो
पथरी (मोरङ), २० जेठ । विराटनगर भन्सार कार्यलयले यो वर्षको कार्तिक, मङ्सिर र वैशाख महिनामा लक्ष्यअनुसार राजस्व सङ्कलन नभएकाले वार्षिक लक्ष्यमा पुग्न गाह्रो हुने जनाएको छ ।
तथ्याङ्क अनुसार कार्तिक महिनामा रु एक अर्ब ५४ करोड लक्ष्य तोकिएकोमा रु एक अर्ब २१ करोड र मङ्सिर महिनामा रु एक अर्ब ४९ करोड लक्ष्य तोकिएकोमा रु एक अर्ब २१ करोड मात्रै राजस्व असुली भएको थियो । अन्य महिनामा भने लक्ष्यअनुसार राजस्व असुली भएको कार्यालयले जनाएको छ ।
कार्यालयलाई १० महिनामा रु १५ अर्ब ५८ करोड १९ लाख ६८ हजार राजस्व सङ्कलन गर्ने लक्ष्य तोकिएकोमा सो अवधिमा रु १४ अर्ब ६० करोड ३८ हजार मात्र सङ्कलन गरेको छ । वैशाखमा लक्ष्यभन्दा २५ प्रतिशत कम राजस्व असुली भएको छ । वैशाखको राजस्व लक्ष्य रु एक अर्ब ६० करोड ८८ लाख ४३ हजार तोकिएकोमा रु एक अर्ब २१ करोड १६ लाख २९ हजार मात्रै असुली भएको छ ।
राजस्व असुली घटेका कारण यो वर्ष लक्ष्य पूरा गर्न गाह्रो हुने भन्सार अधिकृत राजेन्द्र ढुङ्गानाको भनाई छ । भूकम्पका कारण उद्योगी व्यवसायीले आयातीत बस्तुको मात्रा घटाउँदा राजस्व असुलीमा प्रभाव परेको हो । आव २०७१÷७२ को १० महिनामा कार्यालयले लक्ष्यभन्दा बढी राजस्व असुली गरेको थियो ।
गत वर्ष १० महिनाको अवधिमा रु १३ अर्ब ३० करोड राजस्व सङ्कलनको लक्ष्य पाएको विराटनगर भन्सारले रु १३ अर्ब ४७ करोड राजस्व असुली गरेको थियो । चालु आवको १० महिनामा भन्सारले डिजेल आयातबाट सबैभन्दा बढी राजस्व असुली गरेको छ । सो अवधिमा रु ९६ हजार ५९२ लिटर डिजेल आयात भएकोमा रु एक अर्ब ३८ करोड आठ लाख ७९ हजार असुली गरेको छ ।
यस्तै स्टिल सेट क्वाइलको आयातबाट एक अर्ब १९ करोड रुपैयाँ राजस्व असुली भएको छ । यो अबधिमा पेट्रोल, मोटरसाइकल, खाना पकाउने ग्याँस, खानेतेल लगायतका बस्तुहरूको आयात उच्च छ । भूकम्पपीडितका लागि विराटनगर नाकाबाट एक लाख ३८ हजार थान त्रिपाल आयात भएको छ ।
“एक लाख थान व्यापारीक प्रयोजनका लागि र ३८ हजार थान राहत वितरणका लागि त्रिपाल आयात भएको छ” अधिकृत ढुङ्गानाले भन्नुभयो । व्यापारिक प्रयोजनका लागि ४६ वटा फार्महरूले रु नौ करोड मूल्यको त्रिपाल आयात गरेका छन् ।
यस्तै राहत वितरणका लागि भन्दै ९३ वटा सरकारी निकाय तथा गैरसरकारी सङ्घ संस्थाले त्रिपाल, खाद्यान्नलगायतका सामग्री अनुमानित् रु आठ करोड पाँच लाख ७० हजारको आयात गरेका छन् । रासस
