गोकर्णेश्वर नगरस्तरीय अन्तर विद्यालय तेश्रो राष्ट्रपति रनिङ सिल्ड खेलकुद प्रतियोगिताको उपाधि चामुण्डा माविलाई

कपन अनलाइन 
काठमाडौं, बैशाख ६ ।डिफेन्डिङ च्याम्पियन चामुण्डा माविले गोकर्णेश्वर नगरस्तरीय अन्तर विद्यालय तेश्रो राष्ट्रपति रनिङ सिल्ड खेलकुद प्रतियोगिताको उपाधि सोमबार जितेको छ ।विभिन्न ६ खेल समावेश प्रतियोगितामा चामुण्डा सर्वाधिक १ सय ५७ अंकसाथ समग्रमा टिम च्याम्पियन बन्दै उपाधि रक्षा गर्यो  । दोश्रो भएको इस्टपोल १ सय ५५ अंकसाथ दोश्रो भयो । गत संस्करणमा पनि इस्टपोल दोश्रो भएको थियो । ८४ अंक जोडेको बाल सुधारले तेश्रो स्थानमा चित्त बुझायो ।

अन्तिम दिन शंखडोल कराते एकेडेमी भएको करातेको प्रतिस्पर्धाअन्तर्गत छात्र ४२ केजी र एकल कातामा बाल वाटिकाका विकेश मोक्तान, ४७ केजीमा बाल वाटिकाकै सन्जिव वाइबा तथा ५२ केजीमा सरस्वतीका विकास कार्कीले स्वर्ण जिते । छात्राको ४० केजी र एकल कातामा सरस्वतीकी सुस्मिता वाइबा, ४५ केजीमा जोरपाटी विलिभर्सकी सुनिता चौधरी तथा ५० केजीमा लिटिल बडकी अनिता तामाङले पहिलो स्थान हात पारे ।गोकर्णेश्वर नगरपाकिलाद्वारा आयोजित प्रतियोगिताअन्तर्गत भलिबलको छात्रमा चामुण्डा तथा छात्रामा बाल सुधारले उपाधि जिते । कबड्डीमा पनि छात्रमा चामुण्डा तथा छात्रामा बाल सुधारले नै उपाधि चुमे ।

विजेतालाई गोकर्णेश्वर नगरपाकिलाका मेयर सन्तोष चालिसेलगायतले सुन्दरीजलस्थित ओख्रेणी माविमा आयोजित एक कार्यक्रमबीच पुरस्कृत गरे । प्रतियोगितामा एथलेटिक्स, उसु, तेक्वान्दो, कराते, भलिबल र कबड्डी गरी ६ खेलमा प्रतिस्पर्धा भएको गोकर्णेश्वर नगरपालिकाअन्तर्गत शिक्षा तथा खेलकुद उपशाखाका प्रमुख रामनारायण शाहले जनाएका छन् । विभिन्न २३ विद्यालयका करिब २ सय खेलाडीले सहभागिता जनाएका थिए ।