बैकल्पिक पर्यटन

कपन अनलाइन

काठमाडौं, माघ १९  ।अर्जुन पाण्डे

नेपालमा पर्यटन बर्ष मनाइरहँदा छिमेकी देश चीनमा फैलिएको कोरोना भाइरसका कारण नेपाल घुम्न आउने ठूलो संख्यामा चीनीयाँ पर्यटकको कटौती हुने प्रष्ट छ । हाल चीन नेपालको प्रत्यक्ष पर्यटन बजार हो । नेपाल भ्रमण बर्षमा देशमा बीस लाख पर्यटक भित्राउने लक्ष लिएकोमा चीनबाट मात्र पाँच लाख पर्यटक भित्राउने लक्ष लिएको थियो । तर हाल भाइरस संक्रमणको अवस्था हेर्दा यो लक्ष पूरा हुन मुस्किल हुने देखिएको छ ।
पर्यटन बर्षलाइ मध्यनजर गरि देशमा गत बर्ष देखि नै सरकारी र नीजी क्षेत्रबाट ठूलो धनराशीको लगानी भैरहेको छ । यो राष्टिय लगानी हो र यो जोखिम उन्मुख देखिएको छ । देशका एयरलाइन्स, होटल रिसोर्ट, टाभल टेकिंग एजेन्सी, यातायात क्षेत्र तथा तमाम पर्यटन संबद्ध पक्षहरु यसको प्रत्यक्ष मारमा पर्नेछन् । तसर्थ यो घाटा पूर्ति गर्न समयमै बैकल्पिक उपायको खोजी गर्नुपर्दछ । यस्तो बैकल्पिक उपाय के हुन सक्छ ? यस बारे संबद्ध पक्षहरुले चिन्तन, छलफल, अन्तरकृयाहरु हुनु जरुरी भैसकेको छ । के हुन सक्छ त बैकल्पिक उपायहरु ?
आन्तरिक पर्यटनमा जोडः
हाल देशमा आफ्नै देश घुम्ने आन्तरिक पर्यटकको संख्या बर्षेनी बढेको देखिएको छ । यो संख्या अझ बढाउन सकिन्छ । यसको निम्ति सरकारी र नीजि क्षेत्रर एकै ठाउँमा आइ संयुक्त प्रयास थाल्नु पर्दछ । समस्त निजी क्षेत्रले आफ्नो सेवाको गुणस्तरमा बढोत्तरी गर्दै भ्रमण बर्षमा नेपाली पर्यटक लक्षित भ्रमण प्याकेज, नेपाली मौलिक खानाको प्रचार र साविक मूल्यमा विशेष छुटको व्यवस्था आदि आकर्षण थप्नु पर्दछ ।
पर्यटन बर्षको शुरुआत सरकारले जुन सकृयताका साथ गरेको थियो त्यो अहिले केहि मथ्थर देखिएको छ । सरकारी सकृयताको खाँचो अहिले झन महसुस भएको छ । सरकारले भ्रमण विदाको कुरा गरेको धेरै समय भएको छ तर यो कार्यान्वयनमा आउन सकेको छैन । सरकारको संपूर्ण निकायका कर्मचारी, शिक्षक, शेना, प्रहरी सबैलाइ कम्तिमा एक हप्ताको विदा र अनिवार्य भ्रमणको कार्यक्रम ल्याउनु पर्दछ । निजी संघ संस्थारुले पनि यो अभियानमा एक्यबद्धता जनाएर आफ्ना कर्मचारीहरुलाइ खर्च सहितको अनिवार्य भ्रमण विदाको व्यवस्था गर्नु पर्दछ ।
बाह्य पर्यटकका निम्ति चीन बाहेकका देशहरु
चीनमा फैलिएको भाइरसले अन्य देशमा पनि सन्त्रास फैलिएको छ । यसले अन्य देशबाट पनि नेपाल आउने पर्यटकको संख्या कमी हुन सक्तछ । यस तथ्यालाइ ख्याल गरि युरोप र खाडीका देशहरु जहाँ रोजगारीको निम्ति नेपालीहरुको संख्या अत्यधिक छन् ति देशहरुमा कुटनितिक प्रयास गरि नेपालीहरुलाइ भ्रमण बर्षको विदा दिन अनुरोध गर्न सकिन्छ । खाडीमा मात्र पनि लाखौं नेपाली छन्, ति स्वदेश फर्कने कुराले खुसी हुन सक्छन् । यदि यसो गर्न सकियो भने हामीलाइ दुइवटा फाइदा हुन्छ । एउटा त आफ्ना दाजुभाइहरु घर फर्कने अवसर पाउनेछन्, उनिहरुले परिवारसंग बिदा मनाउनेछन् । अर्को केही मात्रामा भएपनि देशका भ्रमणको माहौल बढ्दछ ।
त्यस्तै हालको भाइरस संक्रमणको त्रास घटाउने विविध उपायहरु अपनाउनु पर्ने देखिन्छ । नेपाल भाइरस मुक्त छ भनि प्रचार गरिनु पर्दछ । साथै कहिँ कतै भाइरसको संक्रमण देखियो भने त्यसको उचित उपचार गर्न हामी सक्षम छौं भनी ढाडस दिनु पर्दछ किनकी यो निको नहुने भाइरस होइन रहेछ । चीनमै भाइरसको संक्रमण उपचार भै डिस्चार्ज हुनेहरु प्रसस्तै देखिएका खबरहरु आइरहेका छन् । यो छोटो समयको संक्रमण हो भनि आस्वस्त पार्नु पर्दछ । यदि यस्तो गर्न सकियो भने हाम्रो पर्यटन व्यावसाय हालको संकटबाट जोगीनेछ र साथै भविष्यमा यसको बढोत्तरी निश्चित छ ।