सप्तदेव सहकारीको देवदर्शन कार्यक्रम सम्पन्न

कपन अनलाइन 

काठमाडौ,कार्तिक १४।

बुढानीलकण्ठ नगरपालिका–१० स्थित सप्तदेब बचत तथा ऋण सहकारीले ज्येष्ठ सदस्यहरुको लागि चार नारायण दर्शन कार्यक्रम सम्पन्न गरेको छ ।

संस्थाको “आमाबुबासँग सप्तदेव” उपसमितिले आयोजना गरेको उक्त कार्यक्रममा संस्थाको आमाबुबासँग सप्तदेव बचत योजनामा सहभागी ज्येष्ठ नागरिकसहित २८ जना सहभागी थिए । संस्थाकी अध्यक्ष मञ्जु कुइकेलका अनुसार आजको व्यस्त शहरी परिवेशमा घरका छोराछोरीबुहारी आफ्नो पेशा व्यवसायमा व्यस्त रहनुपर्ने बाध्यता र घरमा आमाबुबाहरु एक्लै बस्नुपर्ने अवस्थालाई दृष्टिगत गर्दै सप्तदेव सहकारीले सन्तानको भूमिका निर्वाह गरेको हो ।

कार्यक्रममा सहभागी सबैभन्दा ज्येष्ठ नागरिक ८८ वर्षिया महालक्ष्मी खकुरेलले एकैदिन चार नारायण दर्शन आफुले पहिलो पटक गरेको भन्दै संस्थाले धेरै राम्रो काम गरेको बताउनुभयो ।

कार्यक्रममा सहभागीहरुले आफु  धेरैवटा सहकारीको सदस्य बनेतापनि सप्तदेवले यस्तो काम गरेर राम्रो शुरुवात गरेको र अझै पनि यस्तै काम गरिरहोस् भन्ने आशीर्वाद प्रदान गरेको संस्थाका संचालक तथा आमाबुबासँग सप्तदेव कार्यक्रमका संयोजक कुमार पुडासैनीले बताउए ।