खुकुरी च्यालेन्ज कप क्रिकेट

कपन अनलाइन 

काठमाडौँ, ११ माघ । खुकुरी च्यालेन्ज कप टि–ट्वेन्टी क्रिकेट प्रतियोगिताअन्तर्गत आज भएको खेलमा मकवानपुर क्रिकेट क्लबले एसएमसी बानेश्वर क्रिकेट क्लबलाई पराजित गर्दै विजयी भएको छ ।

भक्तपुरस्थित सैनिक आवासीय महाविद्यालको खेल मैदानमा भएको खेलमा मकवानपुरले बानेश्वरलाई १८४ रनको भारी अन्तरले पराजित गर्दै विजयी भएको हो । टस हारेर पहिले ब्याटिङको निम्तो पाएको मकवानपुरले निर्धारित २० ओभरमा ६ विकेट गुमाउँदै २४१ रनको योगफल बनायो ।

जवाफी ब्याटिङमा उत्रेको बानेश्वर १५.१ ओभरमा सबै विकेट गुमाउँदै ५७ रनमा समेटियो । मकवानपुरका ब्याट्सम्यान रबि थापाले सर्वाधिक ७७ रनको योगदान दिए । त्यस्तै मणिराज पौडेलले ४७, रमेश उपाध्यायले ३५ तथा नीरज श्रेष्ठले ३४ रनको योगदान दिए ।

त्यसैगरी बानेश्वरका सुरज खड्काले ११ रन जोड्नुबाहेक अन्य ब्याट्सम्यानले दोहोरो अङ्क जोड्न सकेनन् । बानेश्वरलाई सस्तैमा समेट्ने क्रममा मकवानपुरका ओमप्रकाश शाहले तीन विकेट लिए भने रबी थापा, नीरज श्रेष्ठ, अभिषेक झा र शैफुल्ला ओनसरीले समान एक–एक विकेट लिए ।

यस जितसँगै मकवानपुरले दुई अङ्क जोडेको छ । दुई खेल खेलेको मकवानपुरको यो पहिलो जित हो ।

त्यस्तै जारी प्रतियोगितामा तीन खेल खेलेको बानेश्वर तीनै खेलमा पराजय भोग्दै अङ्कविहीन छ । खुकुरी इएनटीको आयोजनामा भएको उक्त खेलमा मकवानपुरका रबी थापा ‘म्यान अफ द म्याच’ घोषित भए । रासस