गुरु : छायादत्त न्यौपाने (कविता )

कपन अनलाइन
काठमाडौं, साउन १२।

मिठा फल शीतल छाया
रुख मेरा गुरु
खोलाझर्ना ढुङ्गा माटो
उत्पादन गुरु

शिक्षा दीक्षा व्यवहारमा
झुल्किदिने गुरु
गुरुजनकै देन हुँ म
हिँड्छु खुरुखुरु

कर्म गर्नु प्राणी हित
रम्नु सबैसित
सँगसँगै खेल्नु कुद्नु
बन्नु सधैं मित

ज्ञानगुन सिपजाँगर
सिकाउने गुरु
उज्यालोमा खेलाउने
जीवन सार गुरु

कमिला र मौरीहरू
पशुपन्छी गुरु
अनुशासन बताउने
विधि सबै गुरु

अँध्यारोलाई चिरिदिने
सिर्जना हुन् गुरु
चेतनाको दैलो खोल्ने
कर्मयोग गुरु

गुरुशिष्य परम्परा
आस्था बिउँझाउँछ
नजिक्याउँछ सिकाइले
जीवन उजिल्याउँछ ।

सहकार्य : कपन बानेश्वर साहित्यिक साप्ताहिक