प्रोजेक्ट वर्क  : टीकाराम जोशी ( लघुकथा)

कपन अनलाइन

काठमाण्डौ ,असार १६।

‘बुवा ! प्रोजेक्ट वर्क सिकाइ दिनु पर्याे। मिसले सादा कागजमा बनाउनु भन्नु भएको छ ।’ स्कुलको पोषाख नखोलेरै हजुरबुवाको अगाडि नातिनीले  झोला फाली अनि स्कूलले होमवर्क दिने गरेको वर्कबुक उनलाई  देखाउँदै भनि ‘यी हेर्नुस् ।’

‘मेक अ चार्ट अफ रियल फुड’ लेखेको उनले देखे ।

‘चार्ट कसरी बनाउने भनि स्कुलमा सिकाएको होला नि त ।’

‘मिसले कागजमा टाँसेर ल्याउनु भनेको छ ।’

‘कागजमा के ले टाँस्ने ? कसरी

टाँस्ने ? के के टाँस्ने ? के लेख्ने ? कसरी

लेख्ने ? केही त सिकाउनु भयो होला नि । जसरी सिकाएको छ तेसैगरी बनाउ ।’

‘मिसले बोर्डमा पेनले थोप्ला थोप्ला बनाउनुभयो र यसैगरी कागजमा  टाँस्नु भनि भन्नुभयो ।’

‘क्लासमा कागजमा  टाँसेर देखाउनु भएन ?’

‘नाईँ, देखाउनु भएन ।’

कक्षा एकमा पढने नातिनीको समस्या समाधान गर्न त उनी सक्थे तर स्कुलले चार्ट बनाउने सिप नसिकाइकनै प्रोजेक्टवर्क दिएकोमा उनी रुष्ट भए ।

‘खोइ तिम्रो होमवर्क दिने नोटबुक ?’

‘डु यु सपोज द पेरेण्ट्स डु द होमवर्क यु गिभ ? फर्स्ट यु टिच  स्टुडेन्ट्स एट स्कुल एन्ड देन गिभ देम रिलेटेड होमवर्क ।’ दैनिक होमवर्क दिने पानाको तलपट्टि अभिभावकको सही भनेको ठाउँमा उनले टिप्पणी लेखे ।

सहकार्य : कपन बानेश्वर साहित्यिक साप्ताहिक

तपाइँको प्रतिक्रिया ।