राष्ट्रपति निर्वाचनको मतगणना सुरु

कपन अनलाइन

काठमाडौँ, फाल्गुन २५ ।

राष्ट्रपति चयनका लागि मतदान सम्पन्न भएसँगै मतगणना सुरु भएको छ।  आज बिहान १० बजेदेखि दिउँसो ३ बजेसम्म भएको मतदानपछि केहीबेर अघि राष्ट्रपति तथा उपराष्ट्रपति निर्वाचनका लागि स्थापना गरिएको निर्वाचन कार्यालय संसद् भवनमा मतगणना सुरु भएको हो।

निर्वाचित हुन कुल मतको ५० प्रतिशतभन्दा बढी मत प्राप्त गर्नुपर्छ। ५० प्रतिशत मत कटाउन नसके पुनः निर्वाचन गर्नुपर्ने कानुनी व्यवस्था छ।  राष्ट्रपतिको चुनावको कुल मतभार ५२ हजार ६२८ तय भएको छ।

पहिलो चरणको चुनावबाट विजय बन्नका लागि प्राप्त गर्ने बहुमत २६ हजार ३१५ चाहिन्छ।राष्ट्रपति निर्वाचनमा एमालेबाट सुवासचन्द्र नेम्वाङ र आठदलीय गठबन्धनबाट रामचन्द्र पौडेल उम्मेदवार छन्।