एक महिना  १४ दिन पछी नेपाल कम्युनिस्ट पार्टीका नेताको लास भेटियो,हत्यारा पक्राउ

कपन अनलाइन

काठमाण्डौ ,पौष २९।

नेता विप्लवको नेतृत्वमा रहेको  नेपाल कम्युनिस्ट पार्टी बैतडी जिल्ला सुर्नयाँ गाँउ कमिटिका सदस्य  विकल्प (डम्वर अवस्थी) को लास हराएको १ महिना  १४ दिन पछी भेटिएको छ।

मंसिर १४ गते वेलुकी ७ः१५ बजे आफ्नो घरमा बोलाएर लगेको मिति देखि विकल्प वेपत्ता अवस्थामा रहेका थिए । फरार शिक्षक हरिष अवस्थीलाई प्रहरीले पुष २३ गते बाँके जिल्लाबाट नियन्त्रणमा लिएर अनुसन्धान गर्दा विकल्पको हत्या गरि उनकै  बारीको ओडारमा गाडेको खुल्न  आएको थियो ।

नेपाल कम्युनिस्ट पार्टीको बिज्ञप्ति :

१.हाम्रो पार्टीका बैतडी जिल्ला सुर्नयाँ गाँउ कमिटिका सदस्य क. विकल्प (डम्वर अवस्थी) सुर्नयाँ गाउँपालीका वडा न. ६ खर्कधार निवासी सिद्धनाथ आधारभुत विद्यालय ध्वजहाल्नाका अस्थायी शिक्षक हरिष अवस्थीले गत मंसिर १४ गते वेलुकी ७ः१५ बजे आफ्नो घरमा बोलाएर लगेको मिति देखि वेपत्ता अवस्थामा हुनुहुन्थ्यो । फरार शिक्षक हरिष अवस्थीलाई प्रहरीले पुष २३ गते बाँके जिल्लाबाट नियन्त्रणमा लिएर बैतडी जिल्ला प्रहरी कार्यालयमा अनुसन्धान गर्दा उनले क. विकल्पको हत्या गरि आफ्नै बारीको ओडारमा गाडेको खुल्न आउँदा प्रहरीले पुष २८ गते वेलुकी ६ बजे क. विकल्पको लास भेटाउन पुग्यो । आफ्नो घरबाट क. विकल्पलाई मंसिर १४ गते बेलुकी बोलाएर हत्या गरी गाडेको लास पुष २८ गते मात्र पत्ता लागेको घटनाले हाम्रो पार्टीलाई मर्माहत र आक्रोषित बनाएको छ । क. विकल्पको हत्याकाण्डको पार्टी घोर निन्दा एवं भ्रत्सर्ना गर्दछ । सर्वप्रथम क. विकल्प प्रति पार्टी भावपुर्ण श्रदाञ्जली अर्पण गर्दछ । उहाँको षड्यन्त्रमुलक हत्याबाट शोकमग्न परिवारजन र आफन्तहरु प्रति गहिरो समवेदना व्यक्त गर्दछ ।

२.वर्तमान अवस्थामा हाम्रो पार्टी एकीकृत जनक्रान्तिको शान्तिपुर्ण राजनीतिक मोर्चामा छ । पार्टी, नेतृत्व, कार्यकर्ता र जनताका विरुद्ध विदेशी साम्राज्यवादी र देशी दलाल पुँजीवादीहरुबाट हुने षड्यन्त्र र हत्या पार्टीलाई कुनै पनि हालतमा शैह्य हुने छैन । यो घटना शान्तिपुर्ण राजनीतिक अवस्थालाई बिथोल्ने राष्ट्रघाती र जनघाती तत्वहरुले घटाएको विभत्स हत्या भएको प्रमाणीत हुन आउँछ । यसर्थ हत्यारालाई कडा कारबाही गर्न र पिडित परिवारलाई उचित राहतको व्यवस्था गर्न नेपाल सरकारसंग पार्टी जोडदार माग गर्दछ ।

३.हाम्रो पार्टी जनक्रान्ति र नेपाली जनताका विरुद्ध आपराधीक दलालहरुले घटाउने घटना र गर्ने षड्यन्त्र विरुद्ध सचेत रहेर पार्टी काम र जनताको सेवामा अझ बढी घनीभुत रुपमा लाग्न सिङ्गो पार्टी पंतिलाई विशेष निर्देशन पनि गर्दछ ।

तपाइँको प्रतिक्रिया ।