दन्त सिविर उद्घाटनको तस्विर भाइरल बनेपछि चम्पादेवी गाउँपालिकाको ध्यानाकर्षण
कपन अनलाइन
ओखलढुंगा ,चैत ५ ।
अहिले सामाजिक सञ्जालमा चम्पादेवी गाउँपालिकामा दन्त सिविर उद्घाटनको तस्विर निकै नै भाइरल भैरहेको छ ।
यो भाइरल तस्बिर ओखलढुंगा जिल्लाको चम्पादेवी गाउँपालिका वडा नम्बर ६ घोराखोरीमा आयोजना गरिएको जेष्ठ नागरिक दन्त उपहार शिविर उद्घाटन कार्यक्रमको हो ।
गत चैत्र ३ गते सोमबार गाउँपालिकाले आयोजना गरेको जेष्ठ नागरिकलाई कृतिम दात लगाइदिने कार्यक्रमकमा अतिथिहरुले बिलन्दुका ५० वर्षीया बराल थरकी बृद्धालाई कृतिम दाँत लगाइदिएर कार्यक्रमको उद्घाटन गरेका थिए ।
प्राप्त जानकारीअनुसार एकजना डाक्टरले ती बृद्धको मुखमा दाँत लगाइदिएका थिए भने अन्य अतिथिहरुले हातमा ग्लोब्स लगाएरै छोएको देखिन्छ ।
यसरी गरिएको शिविर उद्घाटन कार्यक्रममा प्रमुख अतिथि प्रदेश नः १ का सामाजिक विकास राज्यमन्त्री जसमाया गजमेर, प्रदेश १ कै अर्थ समिति सभापति एवं ओखलढुंगाका प्रदेशसभा सदस्य मोहन खड्का हिमशिखर, गाउँपालिका अध्यक्ष नवराज केसी र अन्य जनप्रतिनिधि तथा कर्मचारीहरू रहेका थिए ।
तर जेष्ठ नागरिकलाई कृतिम दाँत लगाइदिने कार्यक्रम निकै प्रभावकारी रहेको भएपनि कार्यक्रमको उद्घाटन गर्ने शैलीप्रति भने धैरैले व्यङ्ग्य गरेका छन् ।
यस विषयमा गाउँपालिका अध्यक्ष नवराज केसीले नियतवस गाउँपालिकालाई बद्नाम गर्ने हिसावले केही व्यक्तिले तस्विरलाई भाइरल बनाएको प्रतिकृया दिदै दाँत डाक्टरले लगाइदिएको र अन्य कार्यक्रमका अतिथिहरुले ती बृद्धाको दाँत हेर्ने क्रमको तस्विरलाई अनावस्यक प्रचार गरिएको बताएका छन।
गाउँपालिकाले बुधबार एक सूचना जारी गर्दै तस्विरलाई अनावश्यक प्रचार गरेको भन्दै ध्यानाकर्षण भएको जनाएको छ ।
